- Войскі тэрытарыяльнай абароны Беларусі вучацца супрацьстаяць БПЛА
- Грузінская мара аб’яўлена пераможцам выбараў
- Якія вынікі выбараў у Японіі?
«Падчас вайсковых збораў войскаў тэрытарыяльнай абароны Беларусі ў Віцебскай вобласці прызыўнікі вучыліся адбіваць атаку БПЛА», – перадае афіцыйную інфармацыю Дзяржкамваенпрама Рэспублікі Беларусь украінскае выданне Ukrainian Military Center.
«Напачатку кастрычніка ў Аршанскім раёне прайшлі вучэнні войскаў тэрытарыяльнай абароны з кіраўніцтвам органаў кіравання тэрытарыяльнай абароны Віцебскай вобласці. Мэта трэніроўкі з тэрытарыяльнымі войскамі вобласці — адпрацоўка адзіных падыходаў да тэрытарыяльнай абароны і праверка яе эфектыўнасці. У ходзе трэніроўкі быў адпрацаваны сцэнарый адбіцця нападу на аб’ект крытычнай інфраструктуры. На вучэннях Войскаў тэрытарыяльнай абароны Беларусі разгорнутыя цэнтры супрацьдзеяння БПЛА. «Тэхніка сувязі» была абраная ў якасці «аб’екта крытычнай інфраструктуры» і прымала непасрэдны ўдзел у вучэннях. Асноўнай дзейнасцю кампаніі з’яўляецца вытворчасць лічбавых і аналагавых сістэм радыёсувязі для праваахоўных органаў, баявой тэхнікі, камплектуючых для ўстаноўкі на бронетэхніку, тэлекамунікацыйнага абсталявання. Як бачна на апублікаваных фотаздымках, падчас вучэнняў былі створаны цэнтры па супрацьдзеянні варожым БПЛА. У прыватнасці, можна заўважыць назіральны цэнтр, абаронены сеткай ад нападу зверху, і цэнтр, абсталяваны імправізаванай вежай. Аднак эфектыўнасць выкарыстання чатырох АК-74 і антыдронавай вінтоўкі для абароны важнай інфраструктуры ад атакі БПЛА здаецца сумнеўнай. З 10 верасня па 3 кастрычніка 2024 года Беларусь правяла вучэнні войскаў тэрытарыяльнай абароны на мяжы з Расеяй у Віцебскай вобласці», – падсумоўвае ўкраінскае выданне.
Па выніках парламенцкіх выбараў у Грузіі Цэнтральная выбарчая камісія заявіла, што перамогу атрымала правячая нацыянал-кансерватыўная партыя Грузінская мара, якая набрала 54 працэнты галасоў. Праеўрапейская апазіцыя заяўляе аб тым, што мелі месца маніпуляцыі, а таму адмаўляецца прызнаваць вынікі галасавання. «Прэм’ер-міністр Венгрыі накіроўваецца ў Грузію, для таго каб адсвяткаваць там перамогу антыеўрапейскіх сіл», – не хавае свайго абурэння міланская Corriere della Sera.
«Цяпер Орбан займае пасаду старшыні ў ЕЗ, і варта паставіцца з усёй сур’ёзнасцю да жэсту, здзяйсняючы які, ён апладыруе ворагам Еўразвяза, а апісаць яго можна толькі адным словам: ‘здрада’. Здрада ў дачыненні да Еўразвяза, здрада тых каштоўнасцяў і альянсаў, якія вызначаюць яго лёс. Сваёй паездкай у Тбілісі Орбан канчаткова скінуў з твару маску – і да ганебнай плямы той антыліберальнай дэмакратыі, якую ён усталяваў у сваёй краіне, дадалася яшчэ і насмешка адкрытага выкліку, якім гэтая паездка стала для міжнароднага аўтарытэту Еўропы. Орбан – сябар Пуціна і іншых. Еўрапейскія краіны не маюць права і далей проста заплюшчваць на гэта вочы», – заўважае італьянская газета.
Курс ены знізіўся да трохмесячнага мінімуму, а мясцовы бізнес баіцца эканамічнай нявызначанасці пасля выбараў у парламент. 27 кастрычніка ў Японіі адбылося пазачарговае галасаванне. Кіруючая кааліцыя краіны, якая складаецца з Ліберальна-дэмакратычнай партыі і партыі “Камэйта”, страціла большасць у ніжняй палаце ўпершыню за больш чым 10 гадоў. Датэрміновыя выбары арганізавалі па ініцыятыве новага прэм’ер-міністра Сігэру Ісібы, ён заняў сваю пасаду 1 кастрычніка. Палітык планаваў заручыцца мандатам ад японскага грамадства пасля шэрагу карупцыйных скандалаў у кіруючай партыі. Вынікі галасавання ён назваў “няпростымі”. «Японская палітыка пагрузілася ў нявызначанасць упершыню за многія гады», – піша The Guardian.
«Ліберальна-дэмакратычная партыя кіравала Японіяй з 1955 года, за выключэннем чатырох гадоў. У гэтую нядзелю яна страціла больш за 50 месцаў на выбарах у Палату прадстаўнікоў, уплывовую ніжнюю палату парламента. Больш за дзесяць гадоў кансерватыўныя ліберальныя дэмакраты лёгка выйгравалі галасаванне. Але на гэты раз грамадскасць нанесла ім зневажальны ўдар: выбаршчыкі стаміліся ад інфляцыі, якая расце, і фінансавых скандалаў, якія акружалі партыю апошнім часам. Гэта адбылося ўсяго толькі праз месяц пасля таго, як Сігэру Ісіба быў прызначаны новым прэм’ер-міністрам. Выглядае на тое, што няўдача Ліберальна-дэмакратычнай партыі гарантавана прывядзе да адстаўкі Ісібы», – прагназуе брытанская газета.
На працягу месяца 360 біскупаў і іншых дзеячаў каталіцкай царквы абмяркоўвалі заключнае камюніке аб будучыні сваёй царквы ў рамках спецыяльна скліканага для гэтага Сінода, які доўжыўся ў агульнай складанасці чатыры гады. Асабліва шмат спрэчак выклікалі пытанні аб тым, у якой ступені каталіцкая царква павінна дэмакратызавацца – і даць жанчынам права займаць афіцыйныя царкоўныя пасады. «Царква апынулася на раздарожжы», – лічыць венская Kleine Zeitung.
«Склікаўшы Сусветны Сінод, Папа Францішак меў намер ініцыяваць дынамічны працэс. На працягу чатырох гадоў біскупы і свецкія, мужчыны і жанчыны, абмяркоўвалі ў Рыме будучыню Касцёла. Уяўленні аб ім вельмі адрозніваюцца, таму і вынік Сінода атрымаўся змяшаным. Пакуль адны ўдзельнікі салідарызаваліся з Глабальным Поўднем і новай культурай уважлівага слухання адзін аднаго, рэфарматары палічылі, што іх надзеі аказаліся падманутымі. Яны мелі намер выкарыстоўваць гэты Сінод, каб свецкія, жанчыны і мясцовыя цэрквы атрымалі б больш улады. Але ні па адным з гэтых пытанняў канкрэтнага рашэння так і не было прынята. Тое, што важна для Еўропы, не абавязкова павінна быць важным для Афрыкі, Лацінскай Амерыкі ці Індыі», – нагадвае аўстрыйскае выданне.
Вольга Сямашка, Беларускае Радыё Рацыя
