Еўразвяз патрабуе ад Вугоршчыны адказу наконт працоўных візаў для Расеі і Беларусі. У адной са школ у Джорджыі адбылася стральба. Пуцін наведаў Манголію – арышту не было. Падрабязнасці свежых матэрыялаў замежнай прэсы.
Вышэйшы чыноўнік Еўрапейскага звязу па пытаннях міграцыі выказаў у сераду заклапочанасць з нагоды праграмы працоўных віз у Венгрыю, адкрытай для грамадзян Расеі і Беларусі, у той час як дыверсіі і абвінавачванні ў шпіянажы выклікаюць трывогу па ўсёй Еўропе.
«Венгрыя пашырыла сваю праграму нацыянальнай карты на грамадзян Расеі і Беларусі, прыняўшы старшынства ў ЕЗ у ліпені. Гэта адбылося, калі прэм’ер-міністр Віктар Орбан ездзіў у Маскву на перамовы з прэзідэнтам Расеі Уладзімірам Пуціным, паездка, якую ягоныя калегі з ЕЗ крытыкуюць», – заўважае LATimes.
«Карта таксама дазваляе грамадзянам з Босніі, Малдовы, Чарнагорыі, Паўночнай Македоніі, Сербіі і Украіны лягчэй увайсці ў зону свабоднай праверкі пасведчання асобы з мэтай працы. Усе шэсць краін з’яўляюцца кандыдатамі на ўступленне ў ЕЗ. Расея і Беларусь — не. Трохі дзіўна насамрэч вітаць канкрэтна грамадзян Расеі і Беларусі ў сітуацыі, калі мы ведаем, што гэтыя краіны варожыя Еўрапейскаму звязу», — цытуе амерыканскае выданне еўракамісара па ўнутраных справах Ілва Ёхансана. – «Прэм’ер-міністр Венгрыі, які, як многія лічаць, мае самыя цёплыя адносіны з Пуціным сярод лідараў ЕЗ, рэгулярна блакаваў, затрымліваў або аслабляў намаганні ЕЗ па аказанні дапамогі Кіеву і ўвядзенні санкцый супраць Масквы за яе дзеянні ва Украіне. Беларусь з’яўляецца галоўным саюзнікам Расеі і служыла тылавой базай расейскіх войскаў», – падкрэслівае амерыканскае выданне.
„Сама меней чатыры чалавекі загінулі і каля 30 атрымалі раненні ў выніку стральбы, якая адбылася 4 верасня ў школе ў горадзе Уіндэр у акрузе Барроу ў амерыканскім штаце Джорджыя», – паведамляе CNN са спасылкай на крыніцу. Афіцыйна інфармацыя пра колькасць пацярпелых пакуль не пацверджана.
Тэлеканал адзначыў, што незразумела, колькі пацярпелых атрымалі агнястрэльныя раненні. Некалькі людзей, якія атрымалі цяжкія раненні, шпіталізавалі на медыцынскіх верталётах. 17-гадовы старшакласнік Серджыа Кальдэр расказаў, што знаходзіўся на ўроку хіміі, калі пачалася стральба. Паводле яго слоў, настаўніца адчыніла дзверы, пасля чаго ў кабінет забег іншы настаўнік, які папрасіў замкнуцца, таму што ў школе вядзецца «актыўная стральба». Школьнік расказаў, што чуў, як у дзверы стукалі і нехта крычаў, каб іх адчынілі, а калі стук спыніўся, пачуліся новыя стрэлы і крыкі. Пасля навучэнцаў эвакуіравалі на футбольнае поле школы, а затым адпусцілі з заняткаў. Белы дом паведаміў, што прэзідэнт ЗША Джо Байдэн паінфармаваны пра тое, што здарылася.
Нягледзячы на тое, што Міжнародны крымінальны суд выдаў ордэр на арышт Уладзіміра Пуціна, той у мінулы аўторак наведаў Манголію. Прэзідэнт Ухнаагійн Хурэлсух прыняў Пуціна ва Улан-Батары з усімі ўшанаваннямі. Пры гэтым Манголія прызнае юрысдыкцыю Міжнароднага крымінальнага суда – і таму была абавязаная арыштаваць расейскага дыктатара. Варшаўскі штотыднёвік Polityka не здзіўлены таму, што арышту не адбылося.
«Улічваючы той факт, што Манголія змушана цэлы час балансаваць паміж Кітаем і Расеяй, адначасна змагаючыся за сваю незалежнасць, наўрад ці можна чакаць ад уладаў Улан-Батара такога сур’ёзнага кроку, як арышт расейскага прэзідэнта. Пуцін гэта цудоўна разумее – верагодна, менавіта таму і паехаў у Манголію. Ён чарговы раз правёў еўрапейскіх і амерыканскіх лібералаў, якія трымаюцца за прынцыпы пасляваеннага сусветнага парадку», – адзначае польскае выданне.
З прычыны вайны на Блізкім Усходзе ўрад Вялікабрытаніі абмежаваў пастаўкі ў Ізраіль узбраенняў брытанскіх вытворцаў. Гэтае рашэнне міністр замежных спраў Злучанага Каралеўства Дэвід Лэмі абгрунтаваў тым, што, маўляў, ёсць асцярогі, што выкарыстанне пэўных відаў узбраенняў можа «садзейнічаць сур’ёзным парушэнням міжнароднага гуманітарнага права». Турынская La Stampa звяртаецца з заклікам да Італіі і Нямеччыны:
«Рашэнне Лондана, якое далучылася такім чынам да Бельгіі і Іспаніі, само па сабе не з’яўляецца значным крокам. Аднак калі такія ж меры прымуць і дзве іншыя еўрапейскія краіны, якія з’яўляюцца буйнымі экспарцёрамі зброі, а менавіта Нямеччына і Італія, то тады гэта ўзмацніла б ціск на Вашынгтон, каб і ЗША пайшлі тым жа курсам. І вось тады, прычым толькі тады, Нетаньяху і аказаўся б загнаным у кут. Аднак гэты момант яшчэ такі далёкі, што нават не праглядаецца на гарызонце».
Агляд сусветнай прэсы падрыхтавала Вольга Сямашка
