Беларусь: чаго хоча моладзь без выбару? Сербія: прэм’ер сышоў у адстаўку. Трамп ужо тыдзень ва ўладзе: да чаго рыхтавацца Еўропе? Падрабязнасці свежых матэрыялаў замежнай прэсы.
Набраўшы 87 працэнтаў галасоў – пры яўцы 86 працэнтаў – на прэзідэнцкіх выбарах у Беларусі сёмы раз запар перамогу атрымаў Аляксандр Лукашэнка. Такая афіцыйная заява Менска. Еўразвяз раскрытыкаваў галасаванне, назваўшы яго “ўяўнымі выбарамі” – ні свабоднымі, ні справядлівымі. Прадстаўнікі апазіцыі да ўдзелу дапушчаны не былі. Браціслаўская Pravda разважае пра тое, што Захад мог бы супрацьпаставіць узурпатару ўлады ў Беларусі, раз ужо дапамагчы грамадзянскай супольнасці на месцах няма магчымасці.
«Лукашэнка настолькі ўмацаваў барыкады свайго рэжыму, што туды не пракрасціся ні найменшаму подыху духу свабоды. Паміж расейцамі і беларусамі ёсць істотная розніца: калі большасць расейскіх выбаршчыкаў падтрымлівае прэзідэнта Уладзіміра Пуціна, то Лукашэнка падтрымкай беларусаў не карыстаецца. Мы гаворым у першую чаргу пра маладое пакаленне беларусаў. У Еўрапейскага звязу дастаткова сродкаў, і ён, да прыкладу, мог бы фінансаваць больш універсітэцкіх стыпендый для беларускіх студэнтаў. Маладыя беларусы, якія жадаюць жыць ва ўмовах нармальнасці і свабоды, гэтага заслужылі», – падкрэслівае славацкае выданне.
Пад ціскам несціхаючых пратэстаў, якія працягваюцца ў краіне вось ужо некалькі месяцаў, у аўторак падаў у адстаўку прэм’ер-міністр Мілаш Вучэвіч. Ён лічыцца блізкім паплечнікам прэзідэнта Аляксандра Вучыча – самага ўладнага і ўплывовага палітыка Сербіі. Дэманстрацыі ў краіне пачаліся пасля таго, як у лістападзе мінулага года на вакзале горада Нові-Сад абрынуўся падстрэшак, у выніку чаго загінулі 15 чалавек. Еўрапейская прэса дзеліцца сваімі назіраннямі. «Сцвярджэнні пра тое, што за гэтымі пратэстамі крыецца рука Захаду, смяхотныя», – піша бялградская Vreme.
«І нават калі некалі такое і здаралася – гэтыя часы даўно мінулі. Вучыча сёння абходжваюць Вашынгтон, Берлін і Парыж, яго ўслаўляюць як “фактар стабільнасці”, пакуль ён выступае з прапановай адмовы ад дамаганняў на Косава, дае гранаты Украіне, здабывае літый, праводзіць выгадныя тэндары і марнуе мільярды падаткаплацельшчыкаў на знішчальнікі. Дэмакратыя, інстытуты, свабода – усё гэта трактуецца ў выпадку Сербіі як нешта эфемернае, як перашкода здзелкам з Вучычам. Яшчэ ніколі не было настолькі бессэнсоўна падзяляць крытыкаў Вучыча на русафілаў і еўрапейцаў, на фанатыкаў у пытанні Косава і прыхільнікаў НАТА, на традыцыяналістаў і лібералаў. Усе яны сядзяць у адной лодцы і ў стане абапірацца толькі адзін на аднаго”, – падкрэслівае сербскае выданне.
Прайшло крыху больш за тыдзень з моманту ўступлення Дональда Трампа на пасаду прэзідэнта Злучаных Штатаў, і, мяркуючы па ўсім, пазіцыя Вашынгтона ва ўнутранай і знешняй палітыцы зведае змены. Еўрапейская прэса разважае пра тое, якімі наступствамі гэта можа абярнуцца ў сферы эканомікі, гандлю і бяспекі Еўропы, і якім чынам на ўсё гэта неабходна рэагаваць. «Нельга выключаць, што Еўропа застанецца без саюзніка ў асобе Злучаных Штатаў», – разважае літоўскі партал Alfa:
«Насуперак асцярогам у сапраўдны момант Трамп не цісне на Украіну і не патрабуе ад яе аднабаковай капітуляцыі. Дагэтуль яго тактыка складалася ў тым, каб пагражаць Пуціну пошлінамі і санкцыямі, з тым каб той скончыў вайну. Аднак незразумела, якімі будуць наступныя крокі Трампа. Праблема, магчыма, заключалася не столькі ў тым, што менавіта ён зробіць, колькі ў тым, што ён ігнаруе патрэбнасці Еўропы ў плане бяспекі. Такім краінам, як Літва, становіцца ўсё ясней, што, магчыма, ім давядзецца задумацца пра тое, якім будзе свет – і што стане гарантыяй іх бяспекі без Злучаных Штатаў. У доўгатэрміновай перспектыве можа скласціся сітуацыя, пры якой Еўропе давядзецца абыходзіцца без Амерыкі», – адзначае літоўскае выданне.
Італьянская пракуратура пачала расследаванне ў дачыненні да прэм’ер-міністра Джорджыі Мелані і іншых членаў урада з-за таго, што з-пад варты быў адпушчаны лівійскі палявы камандзір, які абвінавачваецца Міжнародным крымінальным судом (МУС) у ваенных злачынствах. Як заявіла Мелані, яна падазраецца ў дапамозе злачынцу. Аднак, паводле яе слоў, гэта не абавязвае яе падаваць у адстаўку, а “шантажаваць і запалохваць” яна сябе не дазволіць. Рымская La Repubblica тлумачыць рэакцыю Мелані.
«Відэа, у якім Джорджыя Мелані сама аб’яўляе пра пачатае адносна яе расследаванне на прадмет карупцыі і растраты, – гэта, несумненна, вельмі спрытны піяр-ход. Крыніцай натхнення тут паслужыў Берлусконі, які давёў тактыку прадстаўлення сябе ў ролі “ахвяры юстыцыі” да ўзроўню высокага мастацтва. Няма патрэбы казаць пра тое, што менавіта адбылося, трэба неадкладна нападаць на пракурораў. Наогул Мелані магла б пакласціся на суд, адказны за разбор у дачыненні да членаў урада па абвінавачанні ў парушэнні заканадаўства ў ходзе выканання службовых абавязкаў. Але паколькі яна выбрала іншы шлях, а менавіта – прамую канфрантацыю з іншай галіной улады, то ясна, што тут крыецца нешта большае», – піша італьянскае выданне.
Агляд сусветнай прэсы падрыхтавала Вольга Сямашка
Фота: vitvesti.by
