- У новай ваеннай дактрыне Беларусі ёсць ядзерная зброя
- У Расеі з’явіўся супернік вайны як канкурэнт Пуціна
- У чаканні на мір Ізраіля і Газы
У Беларусі рыхтуецца новая ваенная дактрына, якая дапускае прымяненне ядзернай зброі ў выпадку ўзброенай агрэсіі супраць рэспублікі. «Папраўкі ў яе адбыліся пасля таго, як Расея ўсё-такі паставіла ў Менск тактычную ядзерную зброю на фоне ўзмацнення напружанасці ў рэгіёне з-за вайны ва Украіне, якая працягваецца», – адзначае міжнароднае выданне The Defense Post.
«Беларусь дагэтуль не мела ўласнай ядзернай зброі, і сур’ёзная змена ваеннай дактрыны разглядаецца як «новая старонка» ў будучай абароназдольнасці краіны. Ва ўрадзе не паведамілі канкрэтных дэталяў новай дактрыны, але паведамілі, што дакумент будзе вынесены на зацвярджэнне Усебеларускага народнага сходу. Апошні раз Беларусь карэктавала ваенную дактрыну ў 2016 годзе, каб не адстаць ад «гібрыднай вайны», якая назіралася ў Сірыі і Украіне.
У сярэдзіне 2023 года Расея пачала пастаўляць у Беларусь ядзерныя боегалоўкі нібыта для стрымлівання патэнцыйнай агрэсіі краін NATO. Нягледзячы на тое, што Менск, як мяркуюць, не прымаў актыўны ўдзел ва ўварванні, якое працягваецца ва Украіне, ён падтрымліваў Маскву рознымі спосабамі, у тым ліку з’яўляючыся «стартавай пляцоўкай» для расейскіх войскаў на пачатку вайны. У мінулым месяцы Лукашэнка заявіў, што пастаўка ядзернай зброі малой далёкасці з Расеі ўжо завершана, аднак Масква застанецца кантролёрам ядзернай зброі. Сакратар Рады бяспекі Беларусі Аляксандар Вальфовіч заявіў, што размяшчэнне ядзернай зброі мае на мэце стрымліванне Польшчы. Паведамляецца, што Менск адкрыты да супрацоўніцтва з краінамі NATO «пры ўмове спынення іх агрэсіўнай рыторыкі ў дачыненні да Беларусі», – піша міжнароднае выданне.
Былы дэпутат Дзярждумы Барыс Надзеждзін мае намер балатавацца на выбарах прэзідэнта Расеі. Нягледзячы на мароз, людзі выстройваюцца ў чаргі, каб аддаць за яго свае подпісы. Надзеждзін выказвае рэзкую крытыку ў адрас Пуціна і вайны супраць Украіны. Хаця аглядальнікі і аддаюць належнае палітычнай актыўнасці кандыдата і яго прыхільнікаў, яны лічаць, што шанцаў у Надзеждзіна практычна няма.„У бліжэйшы час насельніцтва Расеі не паўстане супраць Пуціна», – мяркуе фінская газета Kaleva.
«Стомленасць ад вайны адлюстроўваецца ў расейскіх сацыяльных сетках, дзе заяўленыя было перамога і захоп улады ў Кіеве саступілі месца жалобным паведамленням аб загінулых расейскіх салдатах, колькасць якіх расце і расце. Ці выплеснецца гэта незадаволенасць на вуліцы Масквы, Санкт-Пецярбурга ці ж у рэгіёнах, дзе пражываюць нацыянальныя меншасці і дзе справа ўжо даходзіла да першых усплёскаў хваляванняў? Верагоднасць гэтага па-ранейшаму невысокая. Судзячы па ўсім, сілавы апарат моцна трымае краіну пад кантролем, а ў Пуціна дагэтуль маецца мноства прыхільнікаў, у тым ліку і дзякуючы працы машыны прапаганды», – канстатуе фінскае выданне.
Напярэдадні сустрэчы міністраў замежных спраў краін ЕЗ, якая прайшла ў панядзелак, супольнасць чарговы раз выступіла ў падтрымку рашэння «двух дзяржаў для двух народаў». Незадоўга да гэтага ў тэлефоннай размове з прэм’ер-міністрам Ізраіля Біньямінам Нетаньяху прэзідэнт ЗША Джо Байдэн таксама падкрэсліў, што, на яго думку, шлях да міру паміж Ізраілем і палестынцамі пралягае менавіта праз гэты варыянт. «Еўразвяз тут будуе замкі на пяску», – заўважае мадрыдская газета ABC.
«Рашэнне «дзве дзяржавы для двух народаў», якое Барэль прапануе ад імя ЕЗ, – самы разумны і справядлівы спосаб пераадолення несціхаючага канфлікту вакол Палестыны. Адзіная праблема заключаецца ў тым, што гэтае рашэнне нерэалізуемае. Яго не жадаюць габрэі і яго не жадаюць мусульмане, хоць ніводны з бакоў не прызнаецца ў гэтым адкрыта. З першай секунды сваёй гіпатэтычнай падставы такая палестынская дзяржава мела б толькі адну мэту – ліквідацыю Ізраіля, што з’яўляецца відавочнай і недвухсэнсоўнай мэтай ХАМАС і Хезбалы, іх фундатара – Ірана і яго сатэлітаў у рэгіёне. Думка аб падзеле мяжуе з верай у цуд. Гэта – свайго роду плацебо для нашага сумлення, сумлення еўрапейцаў, глыбока занепакоеных тым, што гэта вайна, што відавочна, будзе доўжыцца яшчэ доўга», – адзначае гішпанскае выданне.
Абурэнне наконт планаў нямецкіх ультраправых аб масавай дэпартацыі з Германіі прывяло да буйнамаштабных дэманстрацый супраць правага экстрэмізму па ўсёй краіне. «Хочацца спадзявацца на тое, што пратэсты супраць ультраправых, якія прайшлі ў Германіі, паслужаць натхненнем для іншых еўрапейскіх краін і пашлюць ясны сігнал, які будзе пачуты і ў Вашынгтоне, і ў Маскве», – піша румынскі партал Spotmedia.
«Гэты пратэст стаў сімвалам істотных змен у найбуйнейшай краіне ЕЗ у тым, што тычыцца стаўлення да экстрэмісцкіх рухаў, якія на фоне інфляцыі і выкліканай ёю сацыяльнай і эканамічнай нестабільнасці апошніх двух гадоў відавочна набралі абароты. Ёсць шанец, што гэтыя дэманстрацыі натхняць грамадзян іншых еўрапейскіх краін і што сёлетнія выбары ператворацца ў рэферэндум аб свабодзе, а гэта стане дрэннай навіной як для Трампа, так і для Пуціна», – заклікае румынскае выданне.
Вольга Сямашка, Беларускае Радыё Рацыя
