Фота: malanka.media
Пасля інаўгурацыі парламенту новага складу там рыхтуюцца да правядзення так званага Усебеларускага народнага сходу. Лукашэнка загадаў чыноўнікам, каб ён прайшоў “асабліва ўрачыста ды запамінальна”, паколькі ўпершыню пройдзе ў канстытуцыйным статусе. Гэтыя працэсы адбываюцца на фоне заяваў Лукашэнкі, што ён гатовы балатавацца на пасаду прэзідэнта ў 2025-годзе, прыгадвае палітычны аналітык Аляксандр Фрыдман:
– Сёння ён жадае нам паказаць, каб мы лічылі, што ён будзе прымаць удзел. Таксама не толькі мы, але і ягоная наменклатура, Захаду гэта таксама тычылася. Як там будзе, ну паглядзім. Мне падаецца, што Лукашэнка ўвесь гэты 2024 год будзе весці і далей такую дыскусію з самім сабой, ну зараз яна стала публічная. У тым сэнсе, што рабіць далей.
Так званы, Усебеларускі народны сход збярэцца ў новым статусе 24-25 красавіка. Галоўная палітычная інтрыга, хто яго ачоліць, паколькі статус кіраўніка сходу выглядае важнейшым нават за прэзідэнцкі. Наданне сходу канстытуцыйнага статусу, што адбылося на рэферэндуме, аналітыкі разглядаюць, як спробы транзіту ўлады ў Беларусі.
Беларускае Радыё Рацыя
