Тбіліскі гарадскі суд прысудзіў Міхаілу Саакашвілі дзевяць гадоў пазбаўлення волі па так званай «справе аб пінжаках». Экс-прэзідэнта Грузіі прызналі вінаватым у расстраце бюджэтных сродкаў у буйным памеры, паведамляе «Рэха Каўказа».
Былога начальніка спецыяльнай службы аховы Тэймураза Джанашыю суд прызнаў вінаватым у злоўжыванні службовымі паўнамоцтвамі і аштрафаваў на 300 тысяч лары.
Саакашвілі і Джанашыя раней неаднаразова адпрэчвалі абвінавачванні, заяўляючы, што працэс носіць палітычны характар.
Цяпер Саакашвілі ўжо адбывае шасцігадовы тэрмін. Прысуды ў дачыненні да яго раней былі вынесеныя па дзвюх іншых справах.
Новы тэрмін пазбаўлення волі будзе вылічацца з моманту затрымання Міхаіла Саакашвілі – 1 кастрычніка 2021 года. Такім чынам, згодна з прысудам, на волю ён зможа выйсці толькі 1 кастрычніка 2030 года. Супраць яго працягваюцца судовыя працэсы па справах аб падзеях 7 лістапада 2007 году і аб незаконным перасячэнні мяжы.
