У сераду, 2 красавіка, адбылася кібератака на інфармацыйную сістэму дэпутатаў польскага парламента. Пра гэта паведаміў прэм’ер-міністр Польшчы Дональд Туск.
Паводле яго, пад атаку трапілі найперш дэпутаты кіроўнай польскай партыі — “Грамадзянскай платформы”.
Віцэ-прэм’ер і міністр па лічбавых справах Кшыштаф Гаўкоўскі заявіў, што атака была арганізаванай і спланаванай. Таксама ён паведаміў, адкуль вялася атака. “Кібератака на офісы дэпутатаў і чальцоў парламента была здзейсненая групамі з Расейскай Федэрацыі і Беларусі”, — перадае яго словы Польскае радыё.
Гаўкоўскі падкрэсліў, што дзяржслужбы вельмі сур’ёзна ставяцца да гэтай атакі. Паводле яго, такая атака можа адбыцца супраць кожнай палітычнай партыі і кожнай дзяржаўнай установы.
На думку віцэ-прэм’ера, атака была скіраваная супраць будучых прэзідэнцкіх выбараў у Польшчы. “У іх нічога не атрымаецца”, — дадаў Гаўкоўскі.
