Міністр абароны Беларусі Віктар Хрэнін у інтэрв’ю тэлеканалу «Россия-24» заявіў, што войскі Беларусі будуць збіваць авіяцыю суседніх краін, калі тая перасячэ дзяржаўныя межы.
Міністр заявіў, што з леташняга жніўня зафіксавана шэсць парушэнняў дзяржаўнай мяжы ў паветранай прасторы.
«Мы на ўсе парушэнні рэагуем. Калі трэба – узнімаецца наша баявая авіяцыя, прыводзяцца ў адпаведныя ступені гатоўнасці зенітна-ракетныя войскі. Калі ўжо зусім страчаныя тармазы з іх боку, вядома, мы будзем збіваць, цырымоніцца не будзем», – сказаў Віктар Хрэнін.
Паводле яго, пад выглядам вучэнняў NATO каля межаў Беларусі могуць стварацца ўдарныя групоўкі. Галоўная задача – «не праспаць» гэта, адзначыў міністр.
Аляксандр Лукашэнка 20 лютага заявіў, што польская і амерыканская выведкі рыхтуюць буйнамаштабную правакацыю супраць грамадзянскага насельніцтва Польшчы, у якой абвінавацяць Расею і Беларусь.
Міністр-каардынатар спецслужбаў Польшчы Томаш Семоняк назваў гэтыя сцвярджэнні Лукашэнкі «поўнай лухтой».
Беларускае Радыё Рацыя
