Выдачу ўязных віз і стыпендый грамадзянам Беларусі абмеркавала дэмакратычны лідар Святлана Ціханоўская з міністрам па еўрапейскіх справах Польшчы Адамам Шлапкам.
Перамовы прайшлі на палях міжнароднай канферэнцыі Impact у Познані, паведаміў “Позірку“ галоўны дарадца дэмлідара Франак Вячорка. Выказаўшы Польшчы падзяку за “паслядоўную палітыку ў дачыненні да Беларусі”, Ціханоўская заклікала Шлапку “ўзняць пытанне спрашчэння візавага рэжыму” для беларусаў, зазначыў Вячорка.
Палітык таксама падкрэсліла “неабходнасць захавання пасажырскіх зносін паміж Беларуссю і Еўрасаюзам” і важнасць “падтрымкі незалежных СМІ і культурных ініцыятыў”. “Абмеркавалі таксама прымяненне санкцый, – сказаў дарадца. – Ціханоўская звярнула ўвагу на недапушчальнасць змякчэння абмежаванняў на калійныя ўгнаенні, пакуль не вызваленыя палітвязні, і рэжым працягвае рэпрэсіі”.
На сустрэчы таксама прысутнічала прадстаўніца Аб’яднанага пераходнага кабінета па нацыянальным адраджэнні Аліна Коўшык.
