У панядзелак 13 траўня Святлана Ціханоўская выступіла ў Антвэрпэне перад міністрамі культуры краін Еўразвязу па запрашэнні Бельгіі, якая цяпер старшынюе ў Еўрапейскім Звязе. Таксама Ціханоўская правяла шэраг двухбаковых сустрэч з міністрамі.
У сваім выступе Святлана Ціханоўская звярнула ўвагу на важнасць падтрымкі беларускай культуры, мовы, нацыянальнай тоеснасці. «Беларускае змаганне за дэмакратыю — гэта яшчэ і змаганне за нашую еўрапейскую ідэнтычнасць», — сказала яна. Ціханоўская звярнула ўвагу на маштабную русіфікацыю, якая працягваецца і нават узмацнілася ў Беларусі. “Ва Украіне Расея ваюе снарадамі і танкамі. У Беларусі — змагаецца з дапамогай прапаганды ў культурнай сферы”, — заявіла Ціханоўская.
Разам з Ціханоўскай удзел у сустрэчах бярэ Аліна Коўшык, прадстаўніца Аб’яднанага пераходнага кабінету (АПК) па нацыянальным адраджэнні.
Беларускае Радыё Рацыя
