Раптоўна памёр былы амбасадар у Нямеччыне. З-за антысеміцкіх выказванняў Лукашэнкі Ізраіль адмяніў супольную канферэнцыю.”Я не лідар па натуры”. У Вільні паказалі фільм пра Ціханоўскую, які здымалі чатыры гады.
«Былы пасол Беларусі ў Германіі Дзяніс Сідарэнка раптоўна памёр ва ўзросце 48 гадоў. Дзяніс Сідарэнка быў паслом у Берліне з 2016 года па пачатак гэтага года, калі яго адклікалі і не прызначылі на новую пасаду. Прычына смерці не называецца, але незалежныя агенцтва навін паведамляюць, што ён выпаў з акна кватэры», – перадае DW.
„Праслужыўшы ў Нямеччыне з 2016 года, Сідарэнка быў адкліканы са сваёй пасады ў Берліне дыктатарам Аляксандрам Лукашэнкам і не атрымаў новай пасады. Незалежнае беларускае выданне “Наша Ніва” паведаміла, што Сідарэнка разбіўся да смерці 23 чэрвеня ў шматкватэрным доме ў сталіцы краіны Менску. Сідарэнка скончыў жыццё самагубствам пасля таго, як яго неаднаразова дапытвалі беларускія спецслужбы. Выданне са спасылкай на неназваную крыніцу паведаміла, што былы амбасадар «увесь час праходзіў паліграф [тэсты на дэтэктары хлусні] і допыты». Апазіцыйны палітык Павел Латушка, які жыве ў выгнанні ў Еўразвязе, заявіў , што Сідарэнка вярнуўся ў Беларусь і стаў праблемай для сілавога апарата краіны, ён адчуў моцны псіхалагічны стрэс ад допытаў. У заяве Міністэрства замежных спраў, апублікаванай у Facebook у сераду, гаворыцца, што смерць Сідарэнкі стала “вялікай стратай для дыпламатычнай сям’і Беларусі”. Сідарэнка быў ахарактарызаваны міністэрствам як “таленавіты і адказны дыпламат, прафесіянал і патрыёт, ён атрымаў заслужаны аўтарытэт і павагу сваіх калег і партнёраў як у Рэспубліцы Беларусь, так і далёка за яе межамі”. У Сідарэнкі засталіся дзве дачкі. Міністр замежных спраў Беларусі Уладзімір Макей таксама раптоўна памёр у лістападзе 2022 года ва ўзросце 64 гадоў ад таго, што незалежныя СМІ першапачаткова назвалі сардэчным прыступам. Праз некалькі месяцаў «Наша Ніва» паведаміла, што Макей наклаў на сябе рукі», – праводзіць паралелі DW.
….
Канферэнцыю “Трагедыя і гераізм на беларускай зямлі – да 80-годдзя вызвалення Беларусі ад нямецка-фашысцкіх захопнікаў”, запланаваную на 27 чэрвеня ў Ізраілі, адмянілі з-за апошніх антысеміцкіх выказванняў Аляксандра Лукашэнкі. «Пачалося з таго, што на антыкарупцыйнай нарадзе, якая прайшла ў Беларусі 14 чэрвеня, Лукашэнка, каментуючы нашумелую карупцыйную справу ў краіне, так званую «справу Брыло» (інспектара па Віцебскай вобласці), непразрыста намякнуў, што сярод карупцыянераў у гэтай справе занадта шмат яўрэяў», – нагадвае міжнароднае выданне Detaly.co.il.
«Ізраільскае МЗС у асобе міністра замежных спраў Ісраэля Каца жорстка адрэагавала на падобныя заявы, назваўшы іх «недапушчальнымі і абуральнымі». Акрамя канферэнцыі, у рамках мерапрыемства было запланавана ўскладанне вянкоў да помніка ў памяць аб яўрэйскіх партызанах і байцах гета. Яно павінна было прайсці ў Музеі яўрэйскага воіна Другой сусветнай вайны імя Хаіма Герцага (Латрун). Мерапрыемства планавалася завяршыць фуршэтам, знаёмствам з выставай аб падзеях Другой сусветнай вайны ў Беларусі і экскурсіяй па Музеі яўрэйскага воіна. Арганізатарамі канферэнцыі, якая мелася адбыцца пры падтрымцы Амбасады Беларусі ў Ізраілі, выступілі Згуртаванне тых, хто выжыў у Халакосце, а таксама Згуртаванне выхадцаў з Беларусі ў Ізраілі. Дзяржаўны антысемітызм у Беларусі дасягнуў жахлівых маштабаў і, у першую чаргу, менавіта з-за пазіцыі Лукашэнкі. Як толькі ён прыйшоў да ўлады, мы адразу ж пачулі, што «яўрэяў трэба ўзяць пад кантроль», «Халакост – гэта трагедыя беларускага народа»… Увогуле, махрысты калгасны антысемітызм у сваёй вышэйшай праяве. Пры гэтым самі беларусы – народ en masse – вельмі талерантныя. Цяпер, Лукашэнка да таго ж спрабуе асядлаць агульнасусветны трэнд – калі антысемітам перастала быць вельмі сорамна», – наракае міжнароднае выданне.
….
«21 чэрвеня на тэрыторыі Лукішскай турмы ў Вільні адбылася прэм’ера фільма “Выпадковая прэзідэнтка”. У ім брытанскі рэжысёр Майк Лернер расказаў гісторыю пра тое, як за чатыры гады Святлана Ціханоўская стала лідарам апазіцыі і ворагам дыктатуры. Важныя палітычныя падзеі ў карціне пераплецены з перажываннямі Ціханоўскай», – піша амерыканскае выданне The Straits Times.
«У фільме зафіксаваныя яе першыя крокі як лідара ў выгнанні. Тады ў яе не было каманды, досведу зносін з заходняй прэсай і палітыкамі, упэўненасці і разуменні, што і як казаць. “Я не магу заклікаць да ўвядзення санкцый, – звяртаецца яна сваім дарадцам, якія падрыхтавалі для яе заяву. – Ці ўсё ж магу?” Адзін з самых драматычных момантаў у фільме – пачатак поўнамаштабнай вайны ва Украіне. Нягледзячы на напружанае становішча, Ціханоўская да апошняга не верыла, што Расея пачне ўварванне. У фільме паказана, як у офісе Святланы рыхтавалі зварот да беларусаў, і бачна, што яна сама была раздражнёная, бо ніхто не быў гатовы да такога развіцця падзей», – заўважае амерыканскае выданне.
