Беларуская апазіцыя працягвае пошукі актывісткі Анжалікі Мельнікавай. КНБА Сейма падтрымлівае ўзмацненне санкцый для грамадзян Расеі і Беларусі. Віцебск без прыкрас. Што можна ўбачыць на выставе Шагала ў Дзюсельдорфе?
“Больш за тыдзень адсутнічае інфармацыя аб месцазнаходжанні спікеркі Каардынацыйнай рады (прадстаўнічага органа беларускай апазіцыі) Анжалікі Мельнікавай, якая жыла ў Польшчы. Яна перастала выходзіць на сувязь 25 сакавіка”, – перадае ВВС.
“Як паведаміў 2 красавіка экс-дыпламат і апазіцыйны палітык Павел Латушка, польскім праваахоўнікам не ўдалося ўстанавіць месцазнаходжанне Мельнікавай. Прыярытэтнай версіі прычын яе знікнення ў сілавых органаў няма. У канцы сакавіка польскія ўлады заявілі, што актывістка пакінула тэрыторыю краіны некалькі тыдняў таму. Каманда Латушкі сцвярджае, што мабільны тэлефон Мельнікавай знаходзіцца на тэрыторыі Беларусі. Аднак няма доказаў, што актывістка, якая пакінула краіну ў 2020 годзе, туды вярнулася. Адразу некалькі крыніц гавораць, што з Варшавы Мельнікава паляцела ў Вялікабрытанію. Паводле інфармацыі Латушкі, яе былы муж 23 сакавіка аўтобусам выехаў з Польшчы ў Беларусь. Адзін з чытачоў выдання «Люстэрка» паведаміў, што бачыў мужа Мельнікавай з двума непаўналетнімі дзецьмі пары ў яе родным горадзе Нясвіж. Як пішуць СМІ, Мельнікава заснавала арганізацыю Białoruś Liberty, якая ў тым ліку атрымлівала гранты ад міжнародных донараў. На рахунак гэтай арганізацыі, па дадзеных публікацый, нядаўна павінен быў паступіць перавод для Каардынацыйнай рады памерам каля 100 тыс. еўра. Адна са знаёмых Мельнікавай (яе імя не выдаецца ў мэтах бяспекі) распавяла ў каментары Еўрарадыё, што ў той не было планаў вяртацца ў Беларусь. «Яна [Анжаліка] як чалавек разумны папярэдзіла б кагосьці са свайго блізкага атачэння, што, напрыклад, з’язджае адпачываць ці нейкія іншыя планы, але вось так раптоўна знікнуць – гэта малаверагодна. На Анжаліку гэта не падобна”, – цытуе міжнароднае выданне.
….
Камітэт Сейма Літвы па нацыянальнай бяспецы і абароне падтрымлівае ўвядзенне больш строгіх нацыянальных санкцый у дачыненні да грамадзян Расеі і Беларусі. “У чацвер члены камітэта аднагалосна падтрымалі прапанову кансерватараў Лаўрынаса Кашчунаса, Аўдронюса Ажубаліса і Валдаса Ракуціса аб тым, што выдачу відаў на жыхарства ў Літве грамадзянам Беларусі, як і расейцам, трэба прыпыніць, калі ў іх няма дзеючай візы”, – піша LRT.
“Дзеючыя віды на жыхарства павінны быць ануляваныя, калі грамадзяне Расеі і Беларусі здзейснілі паездкі ў РФ або Беларусь больш за адзін раз на працягу трох каляндарных месяцаў. На думку кансерватараў, у Беларусі гэтыя людзі могуць быць завербаваныя спецслужбамі, ім можа быць даручана выкананне пэўных разведвальных функцый. Выключэнне будзе прымяняцца да перавозчыкаў і вадзіцеляў грузавікоў, якія ідуць транзітам праз вышэйзгаданыя краіны або калі паездка мела аб’ектыўныя прычыны, якія не залежаць ад грамадзяніна. На паседжанні камітэта ў чацвер гэтыя прапановы былі падтрыманыя прадстаўнікамі прэзідэнцкага ведамства і Дэпартамента дзяржаўнай бяспекі (ДДБ), але падвергліся крытыцы з боку бізнес-арганізацый.
Генеральны дырэктар Міжнароднага транспартна-лагістычнага альянсу Павілас Дрыжас сцвярджае, што ў транспартных кампаніях Літвы працуюць каля 36 тыс. беларусаў, пасля ўвядзення санкцый іх колькасць стала змяншацца.
Па словах дарадцы Канфедэрацыі бізнесу Аквіле Разувене, прапанаваныя новыя абмежаванні прывядуць да скарачэння колькасці беларусаў, якія працуюць у Літве, што акажа вялікі, непрапарцыйны ўплыў на літоўскую эканоміку. Канчатковае рашэнне па вышэйпаказаных прапановах прыме Сойм. Урад прапануе захаваць дзейныя абмежавальныя меры для грамадзян Расеі і Беларусі. Закон прыпыняе прыём заяў на атрыманне шэнгенскіх і нацыянальных віз ад грамадзян Расеі і Беларусі, за выключэннем выпадкаў пасрэдніцтва МЗС Літвы, а таксама прыём просьбаў аб выдачы часовых відаў на жыхарства ў Літве. Выключэнне робіцца толькі для тых, у каго ёсць дзеючая шэнгенская або нацыянальная віза, від на жыхарства ў Літве ці іншай краіне Еўрапейскага звяза (ЕЗ). Згодна з законам, расейцам, якія не маюць віду на жыхарства ў Літве, забаронена набываць нерухомасць у Літве. Закон аб абмежавальных мерах быў упершыню прыняты ў Літве ў 2023 годзе. Ён накіраваны на дэманстрацыю падтрымкі Украіны і абмежаванне некаторых правоў грамадзян краін-агрэсараў – Расеі і Беларусі”, – піша міжнароднае выданне.
….
“У Дзюсельдорфе адкрылася выстава Марка Шагала. Асноўную ўвагу на ёй надалі работам, створаным у яго ранні перыяд”, – перадае DW.
“Калі думаеш пра Шагала, то ў першы момант у галаву прыходзіць, што ён быў такім пазітыўным, лёгкім, паветраным. Але ў ранніх працах ён закранаў і негатыўныя тэмы, – кажа куратар выставы Сюзане Майер-Бюзер. – Гэта не былі ідэалістычныя пейзажы – там былі беднасць, прастытуцыя, алкагалізм”.
Пасля канфлікту з Казімірам Малевічам Шагал з’ехаў з Віцебска ў Маскву, а пасля – у Берлін і Парыж, дзе ў 1937 годзе атрымаў французскае грамадзянства. У 1941-м ён уцёк ад вайны і Халакоста ў ЗША. У Віцебск мастак больш не вяртаўся, хаця і бываў у СССР. “Магчыма, ён баяўся, што таго Віцебска, які ён усё жыццё маляваў, больш няма”, – мяркуе лектар Ала Наліванская і паказвае на працу “Святая сям’я i жывёлы”, – адзначае DW.
Беларускае Радыё Рацыя
