Група незалежных экспертаў ААН па Беларусі прадставіла свой першы даклад.
Сейм у Латвіі разгледзіць прапанову забараніць турыстычныя паездкі ў РФ і Беларусь. Больш за 16 тыс. іншаземцаў затрымала ў мінулым годзе польская паліцыя. Беларусы – на трэцім месцы ў антырэйтынгу
Група незалежных экспертаў ААН па становішчы ў галіне правоў чалавека ў Беларусі ў сваім новым дакладзе папярэдзіла, што ўлады Беларусі здзяйснялі шырокамаштабныя парушэнні правоў чалавека ў дачыненні да грамадзянскага насельніцтва, што з’яўляецца “часткай жорсткіх намаганняў па падаўленні любой апазіцыі праўленню прэзідэнта Аляксандра Лукашэнкі”. “Некаторыя з гэтых парушэнняў прыраўноўваюцца да злачынстваў супраць чалавечнасці”, – піша міжнароднае выданне News.un.org.
“Сярод найбольш абуральных зафіксаваных парушэнняў – адвольныя арышты і затрыманні па палітычных матывах, што з’яўляецца “неад’емнай часткай тактыкі беларускіх уладаў. У дакладзе адзначаецца, што мужчыны і жанчыны, якія ўтрымліваюцца пад вартай, рэгулярна падвяргаліся катаванням і жорсткаму абыходжанню, уключаючы збіццё, электрашок і пагрозы аб згвалтаванні. Супрацоўнікі праваахоўных органаў «праяўлялі відавочную жорсткасць» у адносінах да прадстаўнікоў ЛГБТІК+, ужываючы фізічны гвалт і прыніжаючыя чалавечую годнасць выказвання. Дзяржаўныя ўлады стварылі сістэму, якая “сістэматычна парушае правы грамадзян Беларусі на справядлівае судовае разбіральніцтва”. У дакладзе зазначаецца, што ў выніку рэпрэсій, якія працягваюцца, сотні тысяч грамадзян пакінулі Беларусь, у тым ліку юрысты, актывісты, члены арганізацый грамадзянскай супольнасці і журналісты. Нягледзячы на вымушанае выгнанне, многія з іх прыцягваюцца да адказнасці і асуджаюцца па Крымінальным кодэксе за дыскрэдытацыю Беларусі і змову з мэтай захопу дзяржаўнай улады. Група экспертаў зноў заявіла, што выяўленне і судовы пераслед асоб, вінаватых у парушэннях правоў чалавека і злачынствах супраць чалавечнасці, з’яўляецца ключавым фактарам для спынення атмасферы беспакаранасці і неад’емнай часткай правасуддзя для ахвяр”, – падкрэслівае міжнароднае выданне.
“Латвійскі Сейм перадаў у камісію па народнай гаспадарцы прапанаваныя “Новым Адзінствам” папраўкі да закона аб турызме, якія прадугледжваюць забарону для пастаўшчыкоў турыстычных паслуг прапаноўваць і аказваць турыстычныя паслугі ў РФ і Беларусь”, – піша агенцтва LETA.
“Папраўкі накіраваныя як на зніжэнне рызык магчымых парушэнняў правоў грамадзян Латвіі, так і на прадухіленне іх вярбоўкі ў РФ ці Беларусі, заявілі ў “Новым Адзінстве”. Законапраект будзе распаўсюджвацца на ўсіх пастаўшчыкоў турыстычных паслуг, зарэгістраваных у Латвіі. Забарона на аказанне турыстычных паслуг у РФ і Беларусі будзе ажыццяўляцца ў рамках ужо ўведзеных супраць гэтых краін міжнародных санкцый і дазволіць прадухіліць палітычныя і эканамічныя адносіны, якія могуць садзейнічаць агрэсіі або парушэнням правоў чалавека. «Паездкі ў Расею і Беларусь у цяперашні час з’яўляюцца пытаннем бяспекі, які стварае праблемы як для саміх турыстаў, так і для нашых служб. Мы не можам дапусціць, каб тураператары працягвалі арганізоўваць забаўляльныя паездкі, а нашых грамадзян аўтобусамі вазілі ў краіны, якія не саромеюцца заяўляць аб сваім жаданні акупаваць Латвію», – сказаў дэпутат «Новага Адзінства» Гаціс Ліепіньш. Як вынікае са справаздачы Службы дзяржаўнай бяспекі (СДБ) за 2024 год, нягледзячы на неаднаразовыя заклікі СДБ і Міністэрствы замежных спраў не ездзіць у РФ, колькасць падарожнікаў у 2024 годзе падвоілася ў параўнанні з 2023 годам – у сярэднім амаль 2000 жыхароў Латвіі ездзілі ў РФ кожны месяц. На думку “Новага Адзінства”, папраўкі ўмацуюць унутраную бяспеку краіны і абарону яе грамадзян. Абмежаванні неабходныя для таго, каб прадухіліць уцягванне грамадзян Латвіі ў канфлікты ці палітычныя рызыкі, якія могуць узнікнуць пры паездках у Расію ці Беларусь”, – адзначае міжнароднае выданне.
“16 тыс. 437 замежных грамадзян затрымала ў мінулым годзе польская паліцыя за злачынствы і правапарушэнні. Найбольш частай прычынай затрымання было кіраванне транспартным сродкам пад уплывам алкаголю”, – перадае Polskie Radio.
“У 2023 годзе такіх выпадкаў было на 857 больш, паведамляе польская радыёстанцыя RMF FM, якая азнаёмілася з паліцэйскай статыстыкай. Найбольш частай прычынай затрымання было кіраванне транспартным сродкам пад уплывам алкаголю. На першым месцы ў антырэйтынгу – грамадзяне Украіны. Яны найчасцей (9 тыс. 753 чалавекі) парушалі закон у Польшчы. Другое месца ў паліцэйскай статыстыцы займаюць грамадзяне Грузіі. На трэцім месцы – беларусы (1 тыс. 122 чалавекі). Сярод правапарушэнняў – 178 выпадкаў кіравання аўтамабілем пад уплывам алкаголю, 130 крадзяжоў і 59 спробаў дачы хабару”, – перадае Polskie Radio.
Вольга Сямашка, Беларускае Радыё Рацыя
