- Прэзідэнт Дуда для беларускай супольнасці: Я застануся сябрам свабоднай Беларусі
- Лукашэнка не запрасіў назіральнікаў АБСЕ на прэзідэнцкія выбары ў Беларусі
- Як палітвязні ў Беларусі з’яўляюцца для рэжыму кампенсацыйным таварам у абмен на змякчэнне санкцый
Прэзідэнт Польшчы Анджэй Дуда сустрэўся з лідаркай беларускай апазіцыі Святланай Ціханоўскай і прадстаўнікамі беларускай грамадскасці. Ён заявіў, што і пасля заканчэння свайго прэзідэнцтва застанецца сябрам свабоднай, суверэннай і незалежнай Беларусі. “Дуда падкрэсліў, што хоць рады чацвёрты раз прымаць беларусаў на калядна-навагодніх сустрэчах, але ўсведамляе, што гэтыя сустрэчы адбываюцца таму, што беларусы ратуюцца ў Польшчы ад рэжыму”, – перадае Polskie Radio.
«Жадаю, каб у 2025 годзе адбыліся палітычныя перамены, якіх вы так хацелі, — каб Беларусь аднавіла сваю свабоду, суверэнітэт і сапраўдную незалежнасць і зноў стала дэмакратычнай краінай», — падкрэсліў Дуда. «Я кажу пра гэта таму, што ведаю, што ў гэтым месяцы ў Беларусі адбудуцца так званыя выбары, якія, напэўна, не будуць мець дачынення да выбараў у дэмакратычным сэнсе, а значыць, мы будзем мець тое, што мы ўжо назіралі, г.зн. махлярства», — падкрэсліў ён. Прэзідэнт запэўніў, што ён таксама ўсведамляе, што ў сувязі з будучымі выбарамі ў Беларусі цяпер узмацніўся пераслед людзей. На думку Дуды, прыкметай гэтага з’яўляецца прысуд, вынесены ксяндзу Генрыху Акалатовічу. 30 снежня Акалатовіч быў асуджаны ў Беларусі на 11 гадоў пазбаўлення волі. У закрытым працэсе яго судзілі за здраду дзяржаве. Раней хворы 64-гадовы Акалатовіч больш за год знаходзіўся пад вартай. Дуда паведаміў, што яны з Ціханоўскай размаўлялі пра гэты ганебны прысуд. Мы гаварылі пра Анджэя Пачобута, пра ўсіх тых, хто чакае вяртання волі, свабоды вяртання на радзіму», — сказаў прэзідэнт. Ціханоўская падкрэсліла, што «на працягу стагоддзяў рабіліся спробы разарваць сувязі, якія звязвалі Беларусь і Польшчу, але нікому гэта не ўдавалася». Трэба рабіць усё, каб Беларусь была свабоднай, а не ў руках Расеі, — сказала Ціханоўская. — Як калісьці палякі ішлі сваім шляхам свабоды, так цяпер гэтым шляхам ідуць беларусы. Гэта вельмі цяжка, але нішто нас не спыніць». На гэтым тыдні Ціханоўская таксама сустрэлася з прэм’ер-міністрам Дональдам Тускам, старшынём Сейма Шыманам Галоўнем, спікерам Сената Малгажатай Кідава-Блоньскай і міністрам замежных спраў Радаславам Сікорскім. Яна таксама прыняла ўдзел у супольным пасяджэнні камісій Сейму”, – перадае польскае радыё.
“Самаабвешчаны прэзідэнт Беларусі Аляксандр Лукашэнка адмовіўся запрашаць місію АБСЕ для назірання за прэзідэнцкімі выбарамі, запланаванымі на 26 студзеня, што з’яўляецца парушэннем міжнародных абавязацельстваў краіны”, – піша міжнароднае выданне Украінская правда.
“У сумеснай заяве Бюро па дэмакратычных інстытутах і правах чалавека і Парламенцкай асамблеі АБСЕ зазначаецца, што рашэнне беларускіх уладаў не запрашаць назіральнікаў перашкаджае бесстаронняй і незалежнай ацэнцы выбарчага працэсу. Адзначаецца, што на працягу апошніх месяцаў БДІПЧ прыкладала намаганні для ўзаемадзеяння з беларускімі ўладамі на запрашэнне назіральнікаў. Аднак, улічваючы тое, што да дня выбараў засталося менш за тры тыдні, БДІПЧ не змагло ажыццявіць маніторынг ключавых этапаў працэсу. Гэта ўжо трэці раз пасля прэзідэнцкіх выбараў у жніўні 2020 года, калі БДІПЧ не можа назіраць за выбарамі ў Беларусі праз адсутнасць своечасовага запрашэння. 70-гадовы Аляксандр Лукашэнка кіруе краінай 30 гадоў. Ніводныя прэзідэнцкія выбары (2001, 2006, 2010, 2015, 2020), акрамя першых (1994), не былі прызнаныя свабоднымі і справядлівымі на міжнародным роўні. Да папярэдніх выбараў у Беларусі прайшла хваля мітынгаў і пратэстаў у падтрымку апазіцыйных кандыдатаў. У многіх краінах свету не прызналі вынікі тых выбараў, дзе Лукашэнка, паводле версіі ЦВК, атрымаў падтрымку 80% выбаршчыкаў. У прыватнасці, выбары не прызналі ў ЕЗ. Украіна таксама не лічыла легітымнай “інаўгурацыю” самаабвешчанага прэзідэнта Беларусі Лукашэнкі”, – падкрэслівае міжнароднае выданне.
Міжнародныя эксперты каментуюць відэаздымку ў калоніі былога прэтэндэнта на пасаду прэзідэнта Беларусь Віктара Бабарыкі, іх выказванне прыводзіць выданне Voice of America.
“8 студзеня ў інтэрнэце з’явіўся відэазапіс размовы, які былы галоўны рэдактар YouTube-канала NEXTA Раман Пратасевіч зрабіў падчас наведвання калоніі, дзе адбывае 14-гадовы тэрмін зняволення былы прэтэндэнт на пасаду кіраўніка Рэспублікі Беларусь Віктар Бабарыка. Для чалавека ва ўзросце за 60, ён выглядае схуднелым, але не зломленым. Ён не просіць аб літасці. Свежавыбрыты, падстрыжаны, хоць відаць, што гэтую робу, або “кліфт” па-турэмнаму, яму выдалі спехам, новенькую, нават бірка жоўтая, якая сведчыць пра “экстрэмізм”, крыва прышыта і не ў тым месцы, дзе яна павінна быць. Усё гэта кажа пра тое, што гэтая сустрэча была спантанная, пытанні і тое, што ён павінен быў сказаць у эфір, мадэравалі, побач стаялі “апера” – аператыўныя работнікі, якія кантралююць зэка. Віктар Бабарыка з’яўляецца закладнікам Лукашэнкі, таму не варта абмяркоўваць сказанае ім ва ўмовах зняволення. Але, тым не менш, карцінка пасылае сігнал Захаду: “Купляйце нашае, вы ж бачыце, што ён яшчэ жывы і пакуль здаровы”. Піяр-акцыя, да якой быў падключаны Раман Пратасевіч, пачаткова была разлічана на максімальнае асвятленне ў сродках масавай інфармацыі, і найперш – у беларускіх”, – падсумоўвае VoA.
Вольга Сямашка, Беларускае Радыё Рацыя
