- Трамп 2.0 можа стаць шчасцем для Беларусі?
- Ваенная падтрымка ад Беларусі Расеі
- Дзяцей у Гародні ставяць у спісы сацыяльна небяспечных за палітычную актыўнасць бацькоў
“Трамп 2.0 можа стаць дабраславеннем для Беларусі. Вяртанне Трампа ў Белы дом дае беларускаму лідару Лукашэнку акно магчымасцей, каб спыніць свой статус ізгоя і аднавіць адносіны з астатняй Еўропай”, – піша міжнароднае выданне bne IntelliNews.
“Аляксандр Лукашэнка хутчэй за многія амерыканскія інфармацыйныя сеткі абвясціў Дональда Трампа пераможцам нядаўніх прэзідэнцкіх выбараў у ЗША. Лукашэнка засыпаў Трампа кампліментамі і паабяцаў асабіста вылучыць абранага прэзідэнта ЗША на Нобелеўскую прэмію міру, калі той выканае сваё абяцанне «спыніць войны» за мяжой». Такім чынам, Менск шчыра спадзяецца, што Трамп стрымае сваё слова, замарозіўшы вайну ва Украіне, разрадзіўшы напружанасць паміж ЗША і Расеяй і дапамагаючы антыліберальнаму меркантылізму перамагчы на некалі аб’яднаным Захадзе. Але двухбаковыя адносіны са Злучанымі Штатамі самі па сабе малаперспектыўныя для Менска. Трамп не клапоціцца пра малыя краіны, такія як Беларусь, і мала клапоціцца пра ролю Амерыкі як самапрызначанага прыхільніка «свабоды» паўсюль. Ва ўсякім выпадку, захапленне Трампа моцнымі людзьмі сведчыць аб тым, што ён будзе больш памяркоўным да Лукашэнкі, чым любы іншы амерыканскі лідар.
Але хітры Лукашэнка спадзяецца на большае. Як кіраўнік невялікай і адносна беднай краіны, адзіная рэч, у якой Лукашэнка вылучаецца, гэта супрацьстаянне іншых моцных краін адна супраць адной. Беларусь па-ранейшаму моцна залежыць ад Расеі, але на працягу многіх гадоў Лукашэнка заігрываў з Захадам, каб атрымаць рычагі ўплыву на перамовы з прэзідэнтам Расеі Уладзімірам Пуціным, каб з апломбам дамагчыся саступак на танны газ і льготныя крэдыты. Рэжым Лукашэнкі робіць стаўку на перакаліброўку знешняй палітыкі ЗША пад кіраўніцтвам Трампа, якая магла б размарозіць дыпламатычную ізаляцыю Беларусі – дасягнутая без таго, каб Менск не саступаў нічога асаблівага ў пытаннях правоў чалавека і дэмакратычных рэформаў. Гамбіт Лукашэнкі залежыць ад магчымасці Трампа пасрэднічаць у спыненні агню ва Украіне і паменшыць напружанасць паміж ЗША і Расеяй, прапаноўваючы Беларусі магчымасць зноў стаць рэгіянальным актарам”, – адзанчае міжнароднае выданне.
“Беларускія кампаніі пастаўляюць у Расею мікрасхемы заходняй вытворчасці, якія выкарыстоўваюцца ў знішчальніках і ракетах. Частка гэтых фірмаў звязаныя з Лукашэнкам”, – піша расейскае незалежные выданне Meduza і прыводзіць дадзеныя Беларускага раследвальніцкага цэнтра.
“З верасня 2022 па чэрвень 2024 года беларускія кампаніі прадалі расейскім прадпрыемствам мікрасхем больш як на 125 мільёнаў долараў. Пры гэтым, нягледзячы на заходнія санкцыі, частка з іх (амаль на 400 тысяч даляраў) – заходняй вытворчасці. За амаль два гады з Беларусі ў Расею адправілі амаль 10 тысяч мікрасхем амерыканскай і еўрапейскай вытворчасці. Сярод іх – мікрасхемы амерыканскай кампаніі Intel, якія выкарыстоўваюцца для запуску і навігацыі авіябомбаў. Акрамя таго, кампаненты Intel могуць выкарыстоўвацца ў знішчальніках Су-35С, Су-34, беспілотніках “Карсар” і ракетах “Калібр”.
Адна з кампаній, якая пастаўляла мікрасхемы ў Расею, – ТАА «Алексвіт ЛТД». Толькі з верасня 2022 па чэрвень 2023 года яна адправіла ў РФ 131 мікрасхему амерыканскай, фінскай і нямецкай вытворчасці. Уладальнік кампаніі – былы намеснік старшыні Дзяржаўнага мытнага камітэта Беларусі Сяргей Барысюк. Кампанія звязана з Віктарам Шэйманам – даўнім і бліжэйшым паплечнікам Аляксандра Лукашэнкі. Больш за паўтары тысячы амерыканскіх мікрасхем прадала ў Расею “Лагістычная кампанія Усход”, ёй валодае Аляксей Мацвееў, які з 2017 па 2019 год працаваў у Беларускай тэніснай федэрацыі. Тады яе ўзначальваў бізнесмен Сяргей Цяцерын. Ён знаходзіцца пад санкцыямі ЕЗ як чалавек з блізкага кола Лукашэнкі”, – піша расейскае незалежнае выданне.
“Дзяцей у Гародні ставяць у САП за палітычную актыўнасць бацькоў. Сем’і, у якіх бацькі былі затрыманыя пасля 2020 года, прызналі, што знаходзяцца ў сацыяльна небяспечным становішчы (САП), зараз вядома як мінімум пра два такія выпадкі”, – перадае DW.
“Ставяць у статус сацыяльна небяспечнага становішча і тыя сем’і, дзе затрымлівалі і толькі аднаго з бацькоў. Як правіла, аднаго з бацькоў судзілі за “распаўсюджванне экстрэмісцкіх матэрыялаў”. На камісіях аб прызнанні гучалі фразы аб “няправільным ідэалагічным выхаванні”. Папярэджанні аб пастаноўцы суправаджаецца выразам за распаўсюджванне “экстрэмісцкіх матэрыялаў”і з’явіліся ў чатах гарадзенскіх школ і гімназій падчас абмеркаванняў, выкліканых прызнаннем матэрыялаў папулярнага рэгіянальнага партала s13.ru “экстрэмісцкімі”, – удакладняе DW.
Вольга Сямашка, Беларускае Радыё Рацыя
