Што не так з Беларуссю? Японія выказала пратэст Беларусі з-за тэлеперадачы пра “самурая” з Токіо.
«У суседніх з Беларуссю краінах Еўрасаюза ёсць кансэнсус, што Беларусь павінна заставацца незалежнай краінай, а ў будучыні можа быць дэмакратычнай і прадказальнай дзяржавай, з якой можна супрацоўнічаць», – перадае Polskieradio і падсумоўвае бягучую сітуацыю ў краіне з Камілем Клысіньскім, экспертам Цэнтру ўсходніх даследаванняў.
„Лукашэнка пойдзе балатавацца і, вядома, «выйграе» наступныя выбары. Маскве такая сітуацыя, відаць, была больш выгадная. Вельмі папулярны, але малаверагодны тэзіс пра тое, што Расея раптоўна паглынае Беларусь, а яе вобласці становяцца звычайнымі рэгіёнамі ў складзе Расейскай Фэдэрацыі. Аднак нельга выключаць, што Пуцін хацеў бы мець у Менску кагосьці больш паслухмянага, таго, хто будзе цалкам адданы выкананню ўсіх задачаў, пастаўленых Масквой. Напрыклад, сакратара Савета бяспекі Беларусі генерала Аляксандра Вальфовіча.
Русіфікатарскія тэндэнцыі будуць уплываць на беларускую нацыянальную, сацыяльную і дзяржаўную свядомасць і прарасейскія настроі будуць дамінаваць. З сярэдзіны 2021 года беларускія ўлады хаваюць статыстыку гандлю. Мы не ведаем, куды Беларусь адпраўляе нафтапрадукты, якія раней прадавала на Захад і ва Украіну, і што робіць з калійнымі ўгнаеннямі. Ускосна можна скласці карціну па статыстыцы іншых краін, з якімі Беларусь гандлюе, напрыклад, Кітая, але гэта не дае поўнай інфармацыі.
У выгнанні знаходзіцца палітычныя прадстаўнікі беларускіх дэмакратычных сілаў на чале з Святланай Ціханоўскай. Беларуская апазіцыя і яе структуры з’яўляюцца сімвалам таго, што Беларусь зусім не прарасейская, што не ўсе беларусы сімпатызуюць палітыцы Пуціна і Лукашэнкі, што значная частка беларусаў зрабіла цывілізацыйны выбар і гэта еўрапейскі выбар, нават калі сяброўства ў Еўразвязе для Беларусі перспектыва вельмі далёкая. Апошняе трэба аддаць беларусам і беларускам. Яны дастаткова добра арганізаваныя і актыўныя, аб’ядноўваюцца ў розныя аб’яднанні, ладзяць мерапрыемствы, часткова інтэгруюцца паміж сабой, падтрымліваюць сем’і палітвязняў. Але праўда і тое, што доўгае знаходжанне ў эміграцыі шкодзіць і аддаляе ад спраў і настрояў у краіне. Падтрымліваць сувязь з краінай і каналы сувязі з людзьмі на месцах — самая вялікая праблема”, – перадае польскае радыё.
«Японскі ўрад заявіў пратэст Беларусі ў сувязі з выхадам у эфір на яе дзяржаўным тэлебачанні праграмы пра затрыманага па абвінавачанні ў агентурнай дзейнасці японскім грамадзяніне Масатосі Наканісі. Пра гэта паведаміў генеральны сакратар кабінета міністраў Ёсімаса Хаясі», – перадае расейскае незалежнае выданне rtvi.
«Хоць мы настойліва прасілі адмяніць перадачу, вельмі сумна, што ў выніку яна выйшла ў эфір. Пасля эфіру мы адразу ж падалі пратэст у МЗС Беларусі», – адзначыў Хаясі. Ён растлумачыў, што Токіа лічыць, што змест праграмы можа парушаць правы чалавека. 4 верасня тэлеканал “Беларусь-1” у спецыяльна рэпартажы “Правал “самурая” з Токіа” паведаміў аб затрыманні супрацоўніка японскіх спецслужбаў, які займаўся зборам даных аб сацыяльна-палітычнай абстаноўцы ў Беларусі, рэалізацыі кітайскай ініцыятывы “Адзін пояс — адзін шлях”, што адбываецца. на беларуска-ўкраінскай граніцы, а таксама здымкай ваеннай інфраструктуры. У эфіры тэлеканала было сказана, што Наканісі прыбыў у рэспубліку ў 2018 годзе, узяў фіктыўны шлюб з грамадзянкай Беларусі, які потым скасаваў. Па дадзеных СМІ, затрыманы працаваў у Гомелі выкладчыкам японскай мовы ва Універсітэце імя Ф. Скарыны», – перадае расейскае выданне.
У Meta Store з’явіўся першы аб’ект архітэктурнай спадчыны Беларусі У віртуальнай рэальнасці адрадзілася Волпаўская сінагога – адна з найпрыгажэйшых драўляных сінагог Еўропы, знішчаная падчас Другой сусветнай вайны. DW піша пра гісторыю сінагогі і ўдалую спробу яе віртуальнай рэканструкцыі.
«Драўляная сінагога ў мястэчку Воўпа ў Гродзенскай вобласці Беларусі лічылася адной з найпрыгажэйшых у Еўропе. Яе пабудавалі ў першай палове 18 стагоддзі. Будынак быў упрыгожаны мноствам разьбяных дэталяў, а шматкупальная канструкцыя даху стварала ўражанне, што столь парыць у паветры. Падчас Другой сусветнай вайны сінагога была поўнасцю знішчана нацыстамі. Сёння яе зноў можна ўбачыць у пачатковым абліччы – Цэнтр беларуска-яўрэйскай культурнай спадчыны стварыў VR-версію Вялікай Волпаўскай сінагогі, якая зараз даступная і ў Meta Store. Гэта адна з чатырох сінагог Беларусі, якія плануюць адрадзіць у віртуальнай рэальнасці. Таксама можна перанесціся ў сучасную Беларусь і ўбачыць, што знаходзіцца на месцы сінагогі зараз. У Воўпе гэта невялікі мемарыяльны сквер. Беларусь у мінулым можна назваць зямлёй штэтлаў – невялікіх гарадоў з пераважным яўрэйскім насельніцтвам», – перадае нямецкае радыё.
Агляд сусветнай прэсы пра Беларусь падрыхтавала Вольга Сямашка
