У ноч 26 кастрычніка ў Беларусь з Украіны заляцелі не менш за 7 расейскіх дронаў-камікадзэ тыпу «шахед», паведамляе маніторынгавая група «Беларускi Гаюн».
Інфаграфіка: t.me/Hajun_BY
Дроны праходзілі праз «калідор» Славуціч-Прыпяць, заляталі ў напрамку Брагіна, а таксама Пінска/Століна на паўднёвым захадзе краіны.
«Першы заход быў у 02:51 па «транзітным калідоры» са Славуціча ў бок Чарнобыля, а далей у 04:34, 04:43, 05:19, 06:02 і 06:05. Таксама было яшчэ 3 «шахеды», якія рухаліся ў напрамку Беларусі, але іх заход дакладна не пацверджаны, гэта праходы ў 03:20, 06:37 і ў 09:38 раніцы», – піша рэсурс.
Акрамя таго, Паветраныя Сілы ВСУ паведамілі, што адзін з БПЛА, пасля заходу ў Беларусь, больш не вярнуўся ва Украіну, гэта значыць быў лакацыйна страчаны на тэрыторыі Беларусі, зазначаюць аўтары.
Паводле інфармацыі праекта, на працягу ночы і раніцы дзяжурная авіяцыя ВПС Беларусі не ўзнімалася.
