Данія выдзеліць 700 000 еўра для Міжнароднага гуманітарнага фонду падтрымкі беларускіх палітзняволеных.
Пра гэта паведаміў міністр замежных спраў Даніі Ларс Лёке Расмусен напярэдадні сустрэчы з кіраўніцай Кабінета Святланай Ціханоўскай.
Ціханоўская адзначыла, што «мы вельмі ўдзячныя Даніі і ўсім паўночным краінам за салідарнасць і падтрымку. Сёння тысячы людзей знаходзяцца за кратамі, тысячы рэпрэсаваных і іх сем’яў патрабуюць дапамогі, рэабілітацыі і лекавання. Вашая салідарнасць дае надзею, энергію, а галоўнае – упэўненасць, што мы не застанемся сам-насам са сваёй бядой. Дзякуй!»
Раней Міжнародны гуманітарны фонд падтрымалі Нарвегія і Швецыя. За гэты год удалося сабраць больш за 2 мільёны еўра ў падтрымку фонду.
