Пра хуткае пашырэнне кола партнёраў Міжнароднага гуманітарнага фонду дапамогі беларускім палітвязням было заяўлена 11 кастрычніка на пасяджэнні Аб’яднанага пераходнага кабінета (АПК).
Паводле інфармацыі прэс-службы АПК, запрошаны на пасяджэнне галоўны саветнік дэмакратычнага лідара Святланы Ціханоўскай Франак Вячорка паведаміў удзельнікам сустрэчы пра зрухі ў справе стварэння міжнароднага фонду дапамогі рэпрэсаваным і іх сем’ям, заснавальнікам якога раней выступіла Нарвегія, зрабіўшы першы грашовы ўзнос”.
“Пасля перамоў у Осла стала вядома, што ў бліжэйшы час да фонду далучацца яшчэ некалькі краін Еўропы”, — гаворыцца ў паведамленні.
Прадстаўнік АПК па міжнародным і еўрапейскім супрацоўніцтве Уладзімір Астапенка паведаміў удзельнікам пасяджэння аб падрыхтоўцы да “Стратэгічнага дыялогу з ЗША, які адбудзецца ў пачатку снежня 2024 года”, “узгадненні падыходаў да правядзення ацэнкі патрэбнасцей беларускай грамадзянскай супольнасці”, а таксама пра “шэраг мерапрыемстваў” Тыдня Беларусі” ў Бруселі, запланаванай на сярэдзіну снежня”.
Аб фармаванні Міжнароднага гуманітарнага фонду дапамогі беларускім палітвязням было абвешчана ў красавіку падчас візіту Ціханоўскай у Нарвегію. Афіцыйны Осла стаў першым, хто заявіў, што зробіць унёсак – 10 млн нарвежскіх крон (гэта каля 850 тыс. еўра).
У канцы траўня міністр міжнароднага развіцця, супрацоўніцтва і знешняга гандлю Швецыі Ёхан Форсель паведаміў, што Стакгольм выдаткуе 5 млн шведскіх крон (ці каля 430 тыс. еўра) для фонду.
Беларускае Радыё Рацыя
