Як паведаміла партугальская тэлекампанія SIC, Агенцтва па інтэграцыі мігрантаў і прытулку, якім кіруе Міністэрства ўнутраных спраў у Лісабоне, стварыла «спецыяльны канал сувязі» з ваеннымі ўцекачамі з Украіны і бежанцамі з Беларусі. Праз гэты канал яны могуць удакладніць сваё прававое становішча ў Партугаліі.
Дзякуючы гэтай форме сувязі ўцекачы могуць у электронным выглядзе падаваць у агенцтва дакументы, якія пацвярджаюць, што яны не могуць вярнуцца на радзіму.
Агенцтва «прааналізуе іх сітуацыю ў кожным канкрэтным выпадку» і разгледзіць небяспекі, якія пагражаюць грамадзянам Беларусі, Украіны і Расеі пасля магчымага вяртання на радзіму.
Паводле беларускіх актывістаў апазіцыі, агенцтва яшчэ ў жніўні разаслала ім лісты з загадам пакінуць Партугалію. У лістах быў указаны 20-дзённы тэрмін для добраахвотнага выезду. На сітуацыю звярнулі ўвагу ў Аб’яднаным пераходным кабінеце Беларусі.
