Краіны Еўразвязу пацвердзілі рашэнне Еўрапарламенту аб значным узмацненні жорсткасці правілаў надання прытулку. Гэта павінна абмежаваць нелегальную іміграцыю ў ЕЗ, а таксама аслабіць нагрузку на Італію і Грэцыю.
Фота: Tobias Steinmaurer/IMAGO
14 траўня краіны ЕЗ прынялі фармальнае рашэнне, пацвердзіўшы прыняты Еўрапарламентам 10 красавіка пакет з 10 пастановаў, якія прадугледжваюць значнае ўзмацненне жорсткасці Агульнаеўрапейскага заканадаўства аб наданні прытулку, паведамляе Deutsche Welle.
Мігрантаў, якія маюць нязначныя шанцы атрымаць дазвол застацца ў ЕЗ, будуць дэпартаваць хутчэй, а адпаведныя рашэнні будуць прымаць ужо на мяжы. Адзін са складнікаў рэформы — механізм салідарнасці па размеркаванні. У выпадку празмернай колькасці мігрантаў, якія просяць прытулку ў першых краінах уезду ў Еўразвяз — Італіі, Грэцыі, Іспаніі, Кіпры, Мальце — іх будуць абавязаныя прымаць па сістэме квотаў іншыя краіны ЕЗ. Калі нейкая краіна адмаўляецца прымаць уцекачоў, яна наўзамен мусіць надаваць фінансавую дапамогу па іх утрыманні.
У 2023 годзе Еўрапейскае агенцтва ў пытаннях надання прытулку зарэгістравала каля 1,1 млн заяваў, і гэта самы высокі паказчык з 2016 году.
