З 17 красавіка ў Польшчы фатаграфаванне шэрагу публічных аб’ектаў можа прывесці да сур’ёзных наступстваў — ад вялікага штрафу да турмы. Новыя правілы звязаныя з уступленнем у сілу паправак у Закон аб абароне айчыны.
Фота Adrian Grycuk, CC BY-SA 3.0 PL, via Wikimedia Commons.
Сітуацыю каментуе прадстаўнік Беларускай незалежнай асацыяцыі фатографаў Сяргей Міхаленка:
– Канешне, гэта адбываецца ў сувязі з гэтымі новымі ўмовамі. Польшча вядзе абарончую падрыхтоўку. І гэтыя размовы пра будучую вайну. Гэта, канешне, усё палохае. Гэта спроба нейкіх абмежавальных мераў, закрыцца, паспрабаваць такім спосабам засцерагчы аб’екты, хаця, на мой погляд, усе, хто хацеў, ужо даўно сфатаграфаваў, з космасу спадарожнікі гэта ўсё фатаграфуюць, усё гэта можна незаўважна сфатаграфаваць.
Пад забарону фотаздымак трапляюць: электрастанцыі, вайсковыя палігоны, дзяржаўныя ўстановы, суды, масты, чыгуначныя лініі і інш. У краіне з’явіцца новы спецыяльны сімвал — папярэджанне пра забарону фатаграфавання. Улады Польшчы тлумачаць новаўвядзенне патрэбай супрацьстаяць рызыкам шпіянажу.
Цалкам матэрыял:
З Закона аб абароне айчыны, які пачаў дзейнічаць з сённяшняга дня:
Дзе нельга будзе фатаграфаваць?
Забарона на фатаграфаванне распаўсюджваецца прыкладна на 25 тысяч месцаў па ўсёй Польшчы. Перш за ўсё, гэта аб’екты стратэгічнага або абарончага значэння. Сярод іх мы знаходзім:
аб’екты, дзе вырабляюцца, рамантуюцца і захоўваюцца ўзбраенне, ваенная тэхніка і баявыя рэчывы;
склады, дзе захоўваюцца стратэгічныя рэзервы;
масты, віядукі і тунэлі, размешчаныя на дарогах абарончага значэння;
марскія парты абароннага значэння;
аб’екты інфраструктуры сувязі, у тым ліку аб’екты аператараў паштовай сувязі і суб’ектаў гаспадарання;
аб’екты Нацыянальнага банка Польшчы і Банка народнай гаспадаркі і г. д.
Кожны з такіх аб’ектаў павінен быць пазначаны знакам забароны на фатаграфаванне.
Важна.
Забараняецца фатаграфаваць, здымаць на відэа ці іншым чынам запісваць выявы або падабенства:
1) аб’екты, якія маюць асаблівае значэнне для бяспекі або абароны дзяржавы, аб’екты Міністэрства нацыянальнай абароны, аб’екты крытычна важнай інфраструктуры, калі на іх нанесены графічны знак забароны фатаграфавання;
2) асоб або рухомай маёмасці, якія знаходзяцца на аб’ектах.
Беларускае Радыё Рацыя
