Галоўны дарадца Святланы Ціханоўскай Франак Вячорка і дарадца Ціханоўскай па пытаннях канстытуцыйнай рэформы і парламенцкім супрацоўніцтве Анатоль Лябедзька прыбылі ў Кіеў з двухдзённым візітам на запрашэнне Вярхоўнай Рады.
Фота з ФБ Франака Вячоркі
“…Будзем сустракацца з прадстаўнікамі Офіса прэзідэнта Уладзіміра Зяленскага, дэпутатамі Рады, а таксама з дэпутатамі еўрапейскіх парламентаў, якія прыбылі ў Кіеў з нагоды другой гадавіны пачатку поўнамаштабнай расейскай агрэсіі супраць Украіны”, — паведаміў “Позірку” Франак Вячорка. Паводле яго, у планах таксама сустрэча з байцамі палка імя Кастуся Каліноўскага, “якія змагаюцца за Украіну, а значыць, і за Беларусь”.
24 лютага ва Украіне мае адбыцца буйное міжнароднае палітычнае мерапрыемства, але з прычын бяспекі падрабязнасці не паведамляюцца.
