Каардынатар спецслужбаў Польшчы Томаш Семаняк у эфіры Radio ZET 21 лютага назваў «поўным глупствам» заяву Аляксандра Лукашэнкі пра «буйнамаштабную правакацыю супраць грамадзянскага насельніцтва Польшчы», якую нібыта рыхтуюць польская і амерыканская выведкі і ў якой «абвінавацяць Расею і Беларусь».
Паводле Томаша Семаняка, да падобных заяваў Лукашэнкі трэба ставіцца як «да элементаў інфармацыйнай вайны», мэта якіх — «пасеяць напружанасць, прыцягнуць да сябе ўвагу, мабілізаваць грамадскую думку ва ўласнай краіне, паказаць Расеі, што ён настроены супраць Захаду і супраць Польшчы».
20 лютага на нарадзе з кіроўным складам дзяржаўных органаў сістэмы бяспекі ў Менску Аляксандар Лукашэнка абвінаваціў польскую і амерыканскую выведкі ў тым, што яны нібыта «рыхтуюць буйнамаштабную правакацыю супраць грамадзянскага насельніцтва Польшчы, у якой абвінавацяць Расею і Беларусь». Ніякіх доказаў сваім словам Лукашэнка не прывёў.
