Чатыры гады таму беларускія добраахвотнікі стварылі Полк Кастуся Каліноўскага, які сёння адыгрывае важную ролю не толькі на фронце ва Украіне, але і для ўсіх беларусаў у свеце.
Пра гэта заявіў прадстаўнік па нацыянальнай бяспецы Аб’яднанага Пераходнага кабінета Беларусі і былы намеснік камандзіра палка Вадзім Кабанчук:
-Безумоўна, гэта быў валявы акт часткі беларускага грамадства, які дазволіў фактычна беларусам, як нацыі, зберагчы сваё добрае імя ў вачах Украіны. З’ява беларускага добраахвотніцкага аб’яднання пад назвай Полк Каліноўскага ўвойдзе ў беларускую найноўшую гісторыю. Гісторыя і зараз яшчэ пішацца. Таму абсалютна ўсё не было дарэмна.
Ён таксама адзначыў, што агулам на вайне ва Украіне загінула каля 100 беларускіх добраахвотнікаў. А таму асобная ўвага будзе нададзена пытанням правоў і гарантый для сем’яў загінуўшых. Гэта тэма будзе абмяркоўвацца падчас будучага візіту Святланы Ціханоўскай у Кіеў:
-Гэтае пытанне будзе ўздымацца на самым версе, таму што рыхтуецца візіт Святланы Ціханоўскай ва Украіну. І я ведаю, што даўно ўжо складзены пералік пытанняў, якія будуць абгаворвацца. На сённяшні дзень, на жаль, сем’і беларускіх добраахвотнікаў пакуль што не абаронены так, як абаронены сам добраахвотнік.
Фота: Полк Каліноўскага
Вадзім Кабанчук адзначыў, што Полк мае патрэбу ў падтрымцы беларусаў па ўсім свеце, і перш за ўсё ў аўтамабілях для баявых і лагістычных патрэб. Гэта дазволіць добраахвотнікам хутчэй рэагаваць на выклікі фронту і забяспечваць сваю дзейнасць больш эфектыўна.
Цалкам гутарка:
Беларускае Радыё Рацыя
