“Калі зняць санкцыі, то рэпрэсіі ў Беларусі не скончацца ніколі”. Кажа ўдзельнік пікету ля амбасады ЗША ў Вільні. Там 17 лютага, у Дзень прэзідэнта, які адзначаецца ў ЗША ў гэтае чысло, былыя беларускія палітвязні зладзілі невялікую акцыю.
Яна была прымеркаваная да перамоваў амерыканцаў з Лукашэнкам наконт палітзняволеных у Беларусі.
Кажа адзін з удзельнікаў пікету:
-Трамп, які крычыць на ўвесь свет, які ён моцны, перад Лукашэнкам ён такім чынам паказвае сваю слабасць. Лукашэнка гэта праглыне, пераварыць і будзе далей думаць, што ён робіць усё слушна. Таму, калі зняць санкцыі, то рэпрэсіі ў Беларусі не скончацца ніколі. Таму я супраць гэтага кроку. Трэба ціснуць далей. Як тут слушна нядаўна казалі, вызвалене той жа Паліны Шарэнды-Панасюк – гэта не вынік нейкіх саступак, гэта вынік ціску.
Паводле арганізатара пікету, былога палітзняволенага Аляксандра Андрушкевіча, ён таксама хацеў бы больш моцнага ціску на Лукашэнку:
– Трамп можа аказаць на Лукашэнку такі ціск, што ён вызваліць гэтых палітвязняў за адзін дзень без ніякіх умоваў. Як ён зрабіў з Мексікай, таксама ён можа дамагчыся гэтага ад Лукашэнкі. Але калі там свае на гэта погляды, то сёння ў нас два патрабаванні. Першае, гэта вызваленне ўсіх палітвязняў без выключэнняў. І другое, гэта спыненне рэпрэсіяў у Беларусі.
Як зазначае Аляксандр Андрушкевіч, ён будзе ладзіць пікеты ля амбасады ЗША ў Вільні чатыры дні. Ён запрашае ўсіх неабыякавых беларусаў далучацца да яго а 12.00.
У Польшчы таксама будзе зладжаны падобны пікет ля амбасады ЗША ў Варшаве. Ён пройдзе ў гэты чацвер, 20 лютага.
Цалкам матэрыял:
Беларускае Радыё Рацыя, Вільня
