У Балтыйскім моры пачалася новая вайсковая аперацыя, паведаміў міністр нацыянальнай абароны Польшчы Уладзіслаў Касіняк-Камыш. Яна накіраваная на забеспячэнне бяспекі ў сувязі з нядаўнімі правакацыямі з боку Расеі. Пра гэта перадае Польскае радыё.
Інцыдэнты з удзелам расейскай авіяцыі ў рэгіёне Балтыйскага мора адбываліся ў апошнія тыдні некалькі разоў. Пры гэтым расейцы не выконвалі міжнародныя правілы і нават парушалі польскую паветраную прастору.
“Правакацыі Расейскай Федэрацыі сапраўды тычацца ўсіх нашых саюзнікаў на Балтыцы і прымушаюць да такога ўзмацнення нашых місій сёння”, – сказаў ён.
Аперацыя пачалася на гэтым тыдні. У яе рамках былі ўведзеныя дадатковыя меры, якія ўключаюць, у прыватнасці, выкарыстанне самалётаў і верталётаў. Таксама неафіцыйна гавораць аб перакідцы верталётаў з іншых баз у раён Балтыйскага мора і мяжы з Расеяй.
