Каардынацыйная рада Беларусі падчас анлайн прэс-канферэнцыі прадставіла чарговыя вынікі падрыхтоўкі да выбараў у Каардынацыйную раду. Выбары будуць праходзіць анлайн праз лічбавую платформу “Новая Беларусь”.
Кажа спікер Каардынацыйнай рады Андрэй Ягораў:
– Выбары адбудуцца 25 траўня. Агітацыйная кампанія пачнецца 25-га красавіка. Да 25-га красавіка будзе адкрыты перыяд рэгістрацыі выбарчых спісаў. Гэтыя выбары ў Каардынацыйную раду, гэта інавацыйны крок. Анлайн выбары робяць у такім фармаце ўпершыню. Магчыма мы першыя ў свеце, хто выбірае ў прадстаўнічыя органы, праз анлайн-механізмы. Калі мы не знаходзімся ўнутры краіны, а наш прадстаўнічы орган знаходзіцца ў выгнанні.
Кіраўнік платформы “Новая Беларусь” Павел Лiбер, запэўніў, што каманда працуе над тым, каб зрабіць выбары ў КР максімальна бяспечнымі:
– Змогуць карыстацца людзі ўнутры Беларусі, бяспечна пры мінімальных правілах бяспекі, якія мы ім дадзім. Мы зможам паўнавартасна дапусціць да галасавання людзей унутры краіны, а таксама людзей, якія выехалі ці знаходзяцца за мяжой. Вельмі важна, што ўсё ўзаемадзеянне людзей і платформы будуць, з пункту гледжання дадзеных, дэцэнтралізаванымі.
Галасаванне на выбарах у Каардынацыйную раду мусіць прайсці з 25 па 27 траўня 2024 года. Канчатковыя вынікі выбараў плануюць абвясціць 8 чэрвеня 2024 года.
Беларускае Радыё Рацыя
