Міністэрства замежных спраў Літвы адказала на артыкул Максіма Рыжанкова ў газеце Адміністрацыі Лукашэнкі. У артыкуле для «Беларусь сёння» кіраўнік МЗС Беларусі заклікаў Літву аднавіць супрацу па лініі пагранічных і спецыяльных службаў, галіновых ведамстваў, міністэрстваў замежных спраў.
«Міністэрства замежных спраў Літвы не атрымлівала па дыпламатычных каналах прапановы беларускага боку, пра якія гаворыцца ў артыкуле, апублікаваным міністрам замежных спраў Беларусі», — цытуе паведамленне МЗС Літвы LRT. У ведамстве падкрэслілі, што ў Беларусі працягваюцца палітычныя рэпрэсіі, дзяржава працягвае падтрымліваць Расею ў вайне супраць Украіны, а таксама вядзе інфармацыйную вайну супраць еўрапейскіх суседзяў. У МЗС Літвы заявілі, што маюць намер дамагацца далейшай ізаляцыі Беларусі і ўвядзення новых санкцый.
