Новы міністр замежных спраў Літвы Кястуціс Будрыс паабяцаў працягваць падтрымку дэмакратычных сіл Беларусі. Падчас сустрэчы са Святланай Ціханоўскай ён адзначыў, што дэмакратычная і мірная Беларусь з’яўляецца важным элементам нацыянальнай бяспекі Літвы.
Будрыс паабяцаў, што беларусы, якія атрымалі часовы прытулак у Літве, будуць адчуваць сябе ў бяспецы і мець магчымасць працаваць на дэмакратызацыю сваёй краіны. Міністр падкрэсліў неабходнасць міжнароднай рэакцыі на запланаваныя «выбары» ў Беларусі і паабяцаў падняць беларускае пытанне на сустрэчы міністраў замежных спраў краін ЕЗ у студзені. Сярод іншых тэмаў абмяркоўваліся расейская ваенная прысутнасць у Беларусі, праблемы абыходу санкцый і ўплыў Кітая.
Міністр звярнуў увагу на працяг рэпрэсій рэжыму Лукашэнкі і падтрымку ім ваеннай агрэсіі Расеі супраць Украіны. Святлана Ціханоўская сустрэчай з Будрысам пачала кансультацыі з новым літоўскім урадам, сфармаваным пасля парламенцкіх выбараў, і падзякавала міністру за падтрымку і ясную пазіцыю наконт сітуацыі ў Беларусі.
Беларускае Радыё Рацыя
