Аляксандр Лукашэнка правёў новыя кадравыя прызначэнні ў дзяржаўных органах.
Найперш змены закранулі Міністэрства інфармацыі. Новым кіраўніком ведамства стаў Дзмітрый Жук, які да гэтага ўзначальваў выдавецкі дом “Беларусь сёння”. На пасадзе міністра ён змяніў Марата Маркава, былога кіраўніка тэлеканала ОНТ, які кіраваў Мінінфармам з чэрвеня 2024 года.
У сваю чаргу Маркаў прызначаны міністрам культуры. На гэтай пасадзе ён змяніў Руслана Чарнецкага, які ўзначальваў ведамства з снежня 2024 года. Раней Лукашэнка неаднаразова крытыкаваў працу Чарнецкага.
Генеральным дырэктарам Рэспубліканскага унітарнага прадпрыемства “Беларускае тэлеграфнае агенцтва” прызначаны Андрэй Мохар. Да гэтага часу ён працаваў на пасадзе дырэктара дырэкцыі інфармацыйнага вяшчання ЗАТ “Другі нацыянальны тэлеканал”.
Акрамя таго, адбыліся змены і ў складзе ўрада. Віцэ-прэм’ерам па пытаннях будаўніцтва, транспарту і жыллёва-камунальнай гаспадаркі прызначаны Аляксандр Церахаў. Да гэтага ён займаў пасаду генеральнага дырэктара дзяржаўнага вытворчага аб’яднання «Мінскбуд», а яшчэ раней узначальваў Міністэрства ЖКГ.
Кадравыя перастаноўкі адлюстроўваюць далейшую ратацыю кіраўнікоў у сферах інфармацыі, культуры і эканамічнага блоку ўрада.
