Кіраўнік Дзярждэпартаменту ЗША Марка Рубіа абʼявіў аб закрыцьці 83% праграм Агенцтва міжнароднага разьвіцьця ЗША (USAID). Аб гэтым ён напісаў у сацыяльнай сетцы X (былы Twitter).
Фота: EPA/JIM LO SCALZO /PAP
Рашэнне, паводле яго, прынята па выніках шасцітыднёвай праверкі.
«У рамках 5200 кантрактаў, якія зараз адмяняюцца, дзясяткі мільярдаў даляраў былі выдаткаваныя такім чынам, што не паслужылі (а ў некаторых выпадках нават нашкодзілі) асноўным нацыянальным інтарэсам ЗША», — напісаў ён.
Пасля кансультацый з Кангрэсам Дзярждэпартамент мае намер больш эфэктыўна кіраваць астатнімі праграмамі — гэта каля 1000 праграм, адзначыў Рубіа.
У канцы лютага адміністрацыя Дональда Трампа заявіла аб спыненні больш як 90% дапамогі замежным дзяржавам праз USAID. Паведамлялася, што агулам амерыканскія ўлады спынілі дзеянне каля 5800 грантаў, а больш за 500 грантаў USAID захаваліся.
У пачатку сакавіка Вярхоўны суд ЗША адмовіўся задаволіць запыт уладаў аб замарожванні каля 2 мільярдаў даляраў, якія павінныя быць выплачаныя замежным арганізацыям праз USAID за ўжо выкананыя праекты.
USAID — незалежнае амерыканскае ўрадавае агенцтва, створанае Кангрэсам у 1961 годзе і якое налічвае каля 10 тысяч супрацоўнікаў па ўсім свеце, паведамляе svaboda.org.
