Дзяржсакратар ЗША Марка Рубіа паспрабаваў супакоіць еўрапейскіх саюзнікаў падчас выступу на Мюнхенскай канферэнцыі па бяспецы, падкрэсліўшы «непарушную сувязь» паміж ЗША і Еўропай.
У сваёй прамове Рубіа заявіў, што амерыканцы «заўсёды будуць дзецьмі Еўропы», нагадваючы пра гістарычныя карані трансатлантычных адносін. Прысутныя еўрапейскія лідары і чыноўнікі сустрэлі словы апладысментамі, аднак, як адзначае Financial Times, гэта было хутчэй праявай палёгкі на фоне напружанасці ў адносінах.
Паводле выдання, першыя 13 месяцаў другога тэрміну прэзідэнта ЗША Дональд Трамп прывялі да найбуйнейшага крызісу ў трансатлантычных сувязях за апошнія дзесяцігоддзі. Агрэсіўная знешняя палітыка і «здзелачны» падыход да партнёраў выклікаюць занепакоенасць у Еўропе.
Нягледзячы на больш стрыманы тон у параўнанні з леташнім выступам віцэ-прэзідэнта ЗША Джэй Ды Вэнса, сутнасць амерыканскага паслання амаль не змянілася. Рубіа зноў раскрытыкаваў энергетычную палітыку ЕЗ і падыход да міграцыі.
Еўрапейскія лідары, у тым ліку канцлер Германіі Фрыдрых Мерц, паводле звестак выдання, рыхтуюцца да магчымых пагаршэнняў у адносінах з Вашынгтонам. Адзін з еўрапейскіх міністраў адзначыў, што хоць сувязі і не разарваныя, яны істотна змяніліся ў параўнанні з мінулымі гадамі.
