Канцлер ФРГ падчас візіту ў Кіеў прыгразіў Расеі санкцыямі, піша Bild. Фрыдрых Мерц упершыню наведаў сталіцу Украіны ў статусе канцлера і зазначыў, што еўрапейскія саюзнікі заклікаюць да 30-дзённага спынення агню. У адваротным выпадку будзе сур’ёзнае ўзмацненне жорсткасці санкцый і маштабная падтрымка Украіны – палітычная, фінансавая і ваенная.
Фота: Markus Schreiber/AP
Мерц дадаў, што ЗША і асабіста прэзідэнт Дональд Трамп такі падыход таксама падтрымліваюць і “відавочна губляюць цярпенне” да Уладзімера Пуціна, а зараз паміж ЗША і еўрапейскімі саюзнікамі “назіраецца дзіўна высокі ўзровень згоды” ў пытанні ўвядзення санкцый.
Мерц нягледзячы на ”дзіўна высокі ўзровень згоды” з прэзідэнтам ЗША Дональдам Трампам, усё ж адкінуў ідэю правядзення выбараў ва Украіне.
“Канстытуцыя Украіны прадугледжвае, што выбары падчас вайны немагчымыя. Я лічу, што ўсе мы павінны гэта паважаць. Прэзідэнт Зяленскі – легітымна абраны кіраўнік дзяржавы і наш партнёр па перамовах”, – заявіў канцлер у інтэрв’ю BILD пасля прыбыцця ў Кіеў.
Пры гэтым Мерц падтрымаў ідэю Еўразвяза пра стварэнне спецыяльнага трыбунала для прыцягнення да адказнасці расейскага дыктатара Уладзіміра Пуціна і іншых ваенных злачынцаў за агрэсію супраць Украіны.
“Гэта само сабой зразумела. Расея пад кіраўніцтвам Пуціна здзяйсняе найцяжкія ваенныя злачынствы. І, безумоўна, яны павінны быць пакараныя”, – выказаў меркаванне Мерц.
Ён дадаў, што ёсць міжнародныя інстытуты, якія могуць справядліва разгледзець гэтыя справы і яны абавязаны гэта зрабіць.
Учора, 9 траўня, кааліцыя дзяржаў заявіла пра прагрэс у стварэнні Спецтрыбунала для Пуціна і РФ. Там адзначылі, што тыя, хто найбольш адказны за злачынства агрэсіі супраць Украіны, павінны быць прыцягнуты да адказнасці.
