Кіраўнік МЗС Беларусі Максім Рыжанкоў заклікаў свайго польскага калегу не саваць свой нос, куды не варта. Так ён пракаментаваў заяву Радаслава Сікорскага пра так званыя выбары ў Беларусі. “Не сунь свой нос туды, куды табе не варта», — сказаў лукашэнкаўскі міністр у эфіры тэлеканала “Беларусь 1”.
Пры гэтым Рыжанкоў падкрэсліў, што Беларусь адкрытая для дыялогу, спаслаўшыся пры гэтым на беларускага дыктатара. “Прэзідэнт пра гэта сказаў. Больш за тое, у нас вельмі шмат ёсць пытанняў, якія патрабуюць абмеркавання, патрабуюць вырашэння. І Міністэрства замежных спраў Польшчы пра гэта дакладна ведае. У нас ёсць кантакты, мы ў папярэднім парадку пра гэта гаворым», — дадаў Рыжанкоў.
Нагадаем, 26 студзеня кіраўнік МЗС Польшчы Радаслаў Сікорскі пракаментаваў у сацсетках асноўны дзень так званых выбараў у Беларусі.
“Сёння ў Беларусі прэзідэнцкія “выбары”. Чакаць выніку невыносна. Дарэчы, калі ласка, не называйце Лукашэнку „апошнім дыктатарам Еўропы“. Гэта несправядліва. Пуцін пераўзыйшоў яго ў крадзяжы, рэпрэсіях і ваенных злачынствах», — напісаў Сікорскі ў сацсетцы Х.
Беларускае Радыё Рацыя
