Прадстаўнік Беларусі не будзе ўдзельнічаць у першай сустрэчы Рады міру ў Вашынгтоне 19 лютага, паведаміла Радыё Свабода, спасылаючыся на высокапастаўленыя крыніцы.
Стварэнне Рады прэзідэнт ЗША Дональд Трамп ініцыяваў для вырашэння праблемаў сектару Газа. Як паведамляе агенцтва dpa, чакаецца, што ў працы Рады міру возьмуць удзел каля двух дзясяткаў краін, але сярод іх дакладна не будзе сябраў Рады бяспекі ААН Кітаю, Расеі і Францыі.
Сярод назіральнікаў блізкія азіяцкія саюзнікі ЗША Японія і Паўднёвая Карэя, а таксама Індыя і Тайланд. Таксама сярод назіральнікаў — Вялікая Брытанія, ЕЗ і асобныя дзяржавы Еўразвязу: Аўстрыя, Грэцыя, Італія, Кіпр, Нідэрланды, Нямеччына, Польшча, Румынія, Славаччына, Фінляндыя, Харватыя і Чэхія. Нарвэгія і Швайцарыя таксама будуць удзельнічаць у якасці назіральнікаў, як і Аман і Мексіка.
Прэзідэнт ЗША Дональд Трамп абвясціў аб стварэнні Рады міру, якую ён узначальвае, у студзені на Усясветным эканамічным форуме ў Давосе.
Беларускае Радыё Рацыя
