1 лютага на Беласточчыне адбыўся KALINOŬSKI MARŠ 2025, прысвечаны дню народзінаў Кастуся Каліноўскага і ўдзельнікам Паўстання 1863-64 гадоў. Арганізатарам выступіла Беластоцкая філія РУХу пры падтрымцы Беларускай дыяспары Беластоку, клуба “Invictus 1863”, Беластоцкай Харугвы і “Беларускага дома”.
Кажа сябра Рады РУХу Міхал Родзька:
– Гэты марш у нас першы, пробны. Мы збіраемся зрабіць гэта штогадовым мерапрыемствам. У будучым годзе яно будзе больш колькасна па фармату людзей, па фармату самой праграмы. На гэты раз у нас было пэўнае абмежаванне да 50 удзельнікаў. Нас папрасілі гэта зрабіць, бо гэта ўсё ж такі памежная зона. Былі і малыя дзеці, і ўдзельнікі больш сталага ўзросту. Усе дашлі без перашкодаў. Кастусь Каліноўскі – гэта асоба, якая аб’ядноўвае ўсіх беларусаў.
Працягам Маршу стаў аўтапрабег у Мастаўляны, дзе нарадзіўся Кастусь Каліноўскі. Каля яго помніка прайшла ўрачыстая частка з ганаровай вартай у мундурах паўстанцаў ад клуба “Invictus 1863”.
Кажа Васіль Калач:
– Колькасць уражвае, дабірацца сюды далёка і ўзгадняць мерапрыемства таксама не проста. Нягледзячы на ўсё гэта, ахвотных ушанаваць памяць Кастуся Каліноўскага аказалася даволі шмат. Гэта ўзрушвае. Гэта дае надзею, што нашая справа не марная, будзе ісці далей і пашырацца.
– Каго любіш?
– Беларусь!
– То ўзаемна!
– Прыйшоў чарговы раз ушанаваць памяць Кастуся Каліноўскага, бо гэта важна для нас, беларусаў, памяць ад нашым героі.
– Што тагды толькі зажывеш шчасліва, калі над табой ужо маскаля не будзе. Твой слуга – Яська Гаспадар з-пад Вільні.
– Усё вяртаецца, усё роўна мы мусім змагацца з Расеяй і постаць Каліноўскага зноў актуальная.
Агульная працягласць маршруту KALINOŬSKI MARŠ 2025 склала 26 км — узрост, у якім загінуў нацыянальны герой. Арганізатары спадзяюцца, што марш стане штогадовай традыцыяй і пашырыцца ў будучыні.
Марш пачаўся ў мястэчку Гарадок, вядомым па фестывалях “Басовішча” і “Тутака”, дзе існуе вуліца Кастуся Каліноўскага. Удзельнікі прайшлі пешым маршам у бок вёскі Страшава пад нацыянальнымі бел-чырвона-белымі сцягамі і бела-чорна-белымі РУХу.
У Страшава ўдзельнікі ўшанавалі памяць пісьменніка і грамадскага дзеяча Аляксея Карпюка, які падчас Другой сусветнай вайны кіраваў партызанскім атрадам імя Каліноўскага, а таксама вайсковага і палітычнага дзеяча Міколы Дзямідава, сваяка Кастуся Каліноўскага. На прыдарожнай капліцы былі ўскладзеныя выявы герояў і знічкі.
Цалкам матэрыял:
Беларускае Радыё Рацыя
