Нацыянальнае антыкрызіснае ўпраўленне дадаткова выявіла 8 прыездаў груп дзяцей з часова акупаваных рэгіёнаў Украіны ў Беларусь з красавіка 2023 года па верасень 2024 года.
Задакументаваны даты і месцы знаходжання ўкраінскіх дзяцей у Беларусі, прычыны іх перамяшчэння, праграма іх заняткаў падчас знаходжання ў Беларусі, сабраны крыніцы інфармацыі, якія выкарыстоўваюцца для пацверджання дадзеных (фота, відэа, дакументы). НАУ таксама вядзе працу па ідэнтыфікацыі і зборы інфармацыі аб супрацоўніках дабрачыннага фонду імя Аляксея Талая, якія ўдзельнічаюць у незаконным перамяшчэнні ўкраінскіх дзяцей у Беларусь.
Асаблівая ўвага надаецца выяўленню ланцужкоў фінансавання і арганізацыі перамяшчэння дзяцей.
«Будзем працягваць працу па прыцягненні Лукашэнкі і ягоных саўдзельнікаў да міжнароднай крымінальнай адказнасці па некалькіх кірунках, і незаконнае перамяшчэнне ўкраінскіх дзяцей, гэта значыць ваеннае злачынства, з’яўляецца адным з іх», – заявіў кіраўнік НАУ, намеснік кіраўніка Аб’яднанага пераходнага кабінета Павел Латушка.
Беларускае Радыё Рацыя
