715-ы дзень вайны. Расея глушыць GPS у краінах Балтыі, рыхтуючыся да вайны з НАТА.
Пра гэта заявіў камандуючы Сіламі абароны Эстоніі Марцін Херэм, перадае Bloomberg. Па словах Херэма, РФ глушыць сігналы Глабальнай сістэмы пазіцыянавання, якія выкарыстоўваюцца грамадзянскай авіяцыяй ЕЗ, смартфонамі і сістэмамі ўзбраенняў ва Усходняй Еўропе. З мінулага года ў Балтыйскім рэгіёне пачасціліся такія выпадкі. Эстонскі бок мяркуе, што такім чынам РФ праводзіць вучэнні на фоне рызыкі будучага патэнцыйнага канфлікту з НАТА.
Тым часам, амерыканскія дальнабойныя боепрыпасы GLSDB ужо накіроўваюцца ва Украіну. Аб тым на брыфінгу ў Кіеве праінфармавала намесніца дзяржсакратара ЗША Вікторыя Нулянд. Цытата: “ЗША працягваюць аказваць Украіне падтрымку, у тым ліку новыя інвестыцыі, новыя сістэмы ўзбраення”.
GLSDB – гэта гібрыд авіябомбы і некіравальнай ракеты, здольны пераадольваць электронныя перашкоды і паражаць мэты на адлегласці да 150 кіламетраў.
Беларускае Радыё Рацыя
Фота: sas.eu
