Палітвязні, праблемы беларусаў за мяжой і адмена смяротнага пакарання – тэмы, з якімі беларуская дэлегацыя паехала на паседжанні Парламенцкай асамблеі Рады Еўропы, што праходзіць у Страсбургу да 27 чэрвеня. Дэлегацыя Каардынацыйнай рады ўжо трэці раз працуе на палях Рады Еўропы, як прадстаўнічы орган дэмакратычнай грамадзянскай супольнасці.
Кажа старшыня міжнароднай камісіі Каардынацыйнай рады – Аляксандра Мамаева:
-Перш за усё гэта пытанні легалізацыі, мабільнасці, бяспекі беларусаў за мяжой. Другое, зараз ідзе такі вельмі важны трэк па адмене смяротнага пакарання ў Беларусі.
Менавіта смяротная кара, якая існуе ў Беларусі – блакавала паўнапраўны удзел Беларусі ў працах Рады Еўропы. Афіцыйны Менск не з’яўляецца сябрам арганізацыі. Каардынацыйная рада, апазіцыйны прадстаўнічы орган – падрыхтаваў Мемарандум аб адмене смяротнага пакарання:
-І гэты Мемарандум адкрыты да падпісання ўсімі грамадскімі арганізацыямі, праваабарончымі арганізацыямі, таксама людзьмі, якія б хацелі гэта засведчыць. Мы разглядаем гэта як крок у дарожнай мапе па ўступленні ў будучым Беларусі ў Раду Еўропы і ў Парламенцкую Асамблею таксама, а з цягам часу і ў Еўрапейскі Звяз.
«Адмена смяротнага пакарання — базавая каштоўнасць Рады Еўропы». Так раней на беларускую ініцыятыву адрэагаваў генеральны сакратар міжнароднай арганізацыі Ален Берсе.
Цалкам гутарка:
Беларускае Радыё Рацыя
