Беларусы Маямі 10 жніўня выйшлі на мітынг у пятую гадавіну сумнавядомых выбараў 2020 года. Акцыя была арганізаваная аддзелам БАЗА Паўднёвай Фларыды, які ўзначальвае Юлія Буйко.
“Пяць гадоў таму мы дыхалі надзеяй, сэрца білася хутчэй — здавалася, што яшчэ крыху, і дыктатарскі рэжым зваліцца, а Беларусь нарэшце ўбачыць свабоду.
Але тады Лукашэнка, трымаючыся за ўладу зубамі і кіпцюрамі, здолеў утрымацца. І вось, праз пяць гадоў, ён зноў «перавыбраўся» — без сумленных выбараў, пад прыгнётам цэнзуры, з разбітай апазіцыяй і заціснутымі ў страху людзьмі.
Рэпрэсіі супраць тых, хто адважыўся выйсці ў 2020-м і сказаць «не» яго рэжыму, працягваюцца і сёння: арышты, турмы, катаванні, вымушанае выгнанне з роднай зямлі.
Мы памятаем, мы балюча ўзгадваем тыя дні, але і сёння, праз боль і расчараванне, у нас гарыць адна і тая ж думка: Беларусь будзе вольнай. І ніхто не здолее забіць у нашых сэрцах веру ў гэта”, – напісаў на сваёй старонцы ў Фэйсбук адзін з удзельнікаў акцыі Андрэй Пушкароў.
Беларускае Радыё Рацыя
