Апошні тыдзень у беларускіх незалежных медыя абмяркоўваецца інфармацыя пра тое, што беларускія палітычныя партыі не будуць прымаць удзел у выбарах у Каардынацыйную Раду, беларускі «протапарламент».
Гэтую навіну каментуе сябра Каардынацыйнай Рады Раман Кісляк:
– Палітычныя партыя зараз рашаюць гэтае пытанне – удзельнічаць ці не. Канешне, ёсць значныя рызыкі для сяброў партыі ў выпадку ўдзелу, таму што Каардынацыйная рада прызнаная экстрэмісцкім фармаваннем, але тым не менш пытанне гэтае вырашаецца. Размова ідзе пра палітычныя партыі, якія даўно дзейнічаюць у выглядзе партый і аргкамітэтаў.
Раман Кісляк таксама ўпэўнены, што бліжэйшым часам будзе адбывацца змена беларускага палітычнага спектра:
– З’яўляюцца новыя палітычныя структуры. Я думаю, што мы зараз будзем назіраць свайго роду перафарматаванне палітычнага поля, таму што відавочна, што з’яўляюцца новыя палітычныя актары, свайго роду палітычныя партыі і структуры, якія будуць удзельнічаць у выбарах у Каардынацыйную раду.
Праваабаронца Раман Кісляк прадстаўляе ў Каардынацыйнай Радзе беларусаў, што жывуць у Аджарыі, аўтаномнай рэспублікі ў складзе Грузіі, і з’яўляецца намеснікам старшыні арганізацыі «Беларуская дыяспара ў Аджарыі».
Беларускае Радыё Рацыя
