Нягледзячы на тое, што Беларусь не далучылася да Рымскага статуту Міжнароднага крымінальнага суду (МКС), рэжым Аляксандра Лукашэнкі можа быць прыцягнуты да адказнасці за ўдзел у дэпартацыі ўкраінскіх дзяцей з акупаваных Расеяй тэрыторый, калі ёсць доказы гэтага.
Пра гэта на прэс-канферэнцыі для ўкраінскіх СМІ заявіў прэс-сакратар Міжнароднага крымінальнага суда Фадзі эль-Абдала, паведамляе ўкраінская служба Радыё Свабода.
Паводле прадстаўніка Міжнароднага крымінальнага суда, дэпартацыя дзяцей для МКС — гэта пытанне юрысдыкцыі ў дачыненні да канкрэтнага злачынства.
«Гаворка ідзе пра тое, што такія злачынствы маглі быць здзейсненыя на тэрыторыі Украіны. Гэта значыць, незалежна ад таго, вывезлі дзяцей у Расею ці куды-небудзь яшчэ, такія дзеянні могуць падпадаць пад юрысдыкцыю МКС, калі само выкраданне хаця б часткова было здзейсненае на тэрыторыі Украіны», — растлумачыў Фадзі эль-Абдала.
