Зніклая спікерка Каардынацыйнай Рады Анжаліка Мельнікава можа знаходзіцца ў Беларусі, вынікае з апублікаванага 6 траўня расследавання польскага выдання Polityka.
Са спасылкай на “дзве незалежныя крыніцы” медыя паведамляе, што 26 лютага палітык вылецела з Варшавы ў Лондан, дзе “перасела на самалёт да Шры-Ланкі”.
Адзначаецца, што Мельнікава раней адпачывала ў гэтай астраўной дзяржаве ў Паўднёвай Азіі — у студзені 2024 года ў горадзе Унаватуна. Яна “праводзіла там час у кампаніі мужчыны”.
У публікацыі прыводзяцца словы неназванай сяброўкі спікеркі, якая нібыта паведаміла: Мельнікава паказала ёй фатаграфіі мужчыны і “яго заручальны пярсцёнак” і “сказала, што ён з Беларусі, спартовец, і што яна закаханая ў яго”.
Выданне мяркуе, што на Шры-Ланцы Мельнікава магла трапіць у “пастку спецслужб” і апынуцца ў Беларусі.
