У Вільні 5 лістапада прайшла сустрэча з удзельнікамі кааліцыі “За вызваленне палітвязняў у Беларусі” Валерам Кавалеўскім, Вольгай Гарбуновай і Таццянай Хоміч. Сустрэчу ў Беларускім Замку арганізавала валанцёрская арганізацыя “Дапамога” на чале з Наталляй Калегавай.
Як зазначае Наталля Калегава, яна была раней супраць перамоваў з Лукашэнкам, але яна бачыць і пазітыў ад гэтага, што людзей выпускаюць, у тым ліку і яе знаёмых, па сканчэнні тэрміну даўніны.
– Хоць ён усё роўна садзіць людзей, і многа, але ёсць і такія, якіх ён раптам пасадзіў і іх нават прызналі, дзякуй Богу, палітзняволенымі, бо яны адседзелі свае тры месяцы, і раптам іх выпусцілі, цалкам закрыўшы справу. Канешне, трэба адразу выязджаць, бо далей нешта знойдуць, але гэта ўжо другая гісторыя.
Беларусы абвінавачваюць удзельнікаў кааліцыі ў тым, што яны збіраюцца наладжваць сувязь з Лукашэнкам і заклікаюць да зняцця санкцый. На што Валер Кавалеўскі пацвердзіў, што ім сапраўды часта “прылятае”:
– Часта ёсць інтэрпрэтацыя таго, што мы гаворым, што мы робім. Ніхто наўпрост ніколі не сказаў, што Лукашэнка добры і з ім трэба сябраваць. Лукашэнка той чалавек, які можа прымаць рашэнні пра вызваленне людзей ці пра спыненне рэпрэсій.
Падчас сустрэчы ад былых палітвязняў гучала шмат вострых пытанняў наконт так званых перамоваў з рэжымам Лукашэнкі, праходжання паліграфа, скандалаў у дэмакратычным асяроддзі і зняцця санкцый.
Напрыканцы ўдзельнікі кааліцыі “За вызваленне палітвязняў у Беларусі” заклікалі прысутных падпісаць створаны імі маніфест на іх сайце па вызваленні беларускіх палітзняволеных.
Цалкам матэрыял:
Беларускае Радыё Рацыя
