Беларуская дэмакратычная лідарка Святлана Ціханоўская наведвае з працоўным візітам Брусель. Раніцай 18 сакавіка яна ўзяла ўдзел у сустрэчы міністраў Еўразвязу па еўрапейскіх справах.
«Пакуль Лукашэнка ва ўладзе, Еўрапейскаму Звязу будзе ўвесь час пагражаць небяспека… Беларусь паказвае, што дэмакратыя і бяспека ўзаемазвязаныя: калі ўрад не паважае свой народ – ён не будзе паважаць і сваіх суседзяў», – казала Ціханоўская, звяртаючы ўвагу ў тым ліку на міграцыйны крызіс. Палітык прапанавала тры практычныя крокі:
– працягваць ціск на рэжым Аляксандра Лукашэнкі;
– узмацніць падтрымку грамадзянскай супольнасці і дэмакратычных ініцыятыў, тэрмінова кампенсаваць скарачэнне амерыканскай дапамогі, каб захаваць беларускія незалежныя медыя;
– забяспечыць выдачу візаў і прававы статус для беларусаў, знайсці комплексны развязак для праблем тысяч беларусаў у ЕЗ, якія не могуць падоўжыць тэрмін дзеяння пашпартоў або вярнуцца дадому.
