Сустрэча адбылася падчас Дэльфійскага эканамічнага форуму ў Грэцыі.
Кіраўніца Кабінета выказала падзяку Радаславу Сікорскаму за моцны голас у падтрымку свабоднай Беларусі на міжнароднай арэне, у непрызнанні рэжыму Лукашэнкі, а таксама ў падтрымку беларусаў у Польшчы.
Разам з Сікорскім Ціханоўская абмеркавала спіс прапаноў, падрыхтаваных Аб’яднаным Пераходным Кабінетам і НАУ. У прыватнасці, размова вялася аб:
- ваенна-палітычнай сітуацыі ў Беларусі, апошніх пагрозах дыктатара ў бок Польшчы; пастаўках рэжымам узбраенняў для расейскай арміі;
- праблемах з атрыманнем польскіх віз для беларусаў унутры краіны, а таксама ў трэціх краінах, дзе пражываюць беларусы;
- пашырэнні практыкі выдачы палітычнага прытулку для беларусаў, якія не могуць вярнуцца на радзіму;
- працягу падтрымкі польскім урадам тэлеканала «Белсат», незалежных медыя, грамадзянскай супольнасці;
- узмацненні санкцыйнага ціску і абмежаванні транзіту падсанкцыйных тавараў праз беларуска-польскую мяжу; прыцягненні рэжыму да адказнасці;
- магчымых кроках для вызвалення палітзняволеных — асобна абмеркавалі лёс Анджэя Пачобута, а таксама смерць Аляксандра Кулініча;
- фармалізацыі адносін з Аб’яднаным Пераходным Кабінетам; стварэнні міжведамаснай працоўнай групы па пытаннях Беларусі і беларусаў;
- правядзенні польска-беларускай канферэнцыі імя Т. Касцюшкі для ўмацавання польска-беларускіх сувязей і выпрацоўкі стратэгіі па Беларусі;
- удзеле дэмакратычных сіл у праграме «Усходняе партнёрства», а таксама іншых міжнародных фарматах.
Крыніца: t.me/CabinetBelarus
Беларускае Радыё Рацыя
