Святлана Ціханоўская удзельнічае ў Адкрытым форуме NATO, які праходзіць паралельна з самітам Паўночнаатлантычнага альянсу ў Гаазе. Як паведаміла выданне “Позірк”, яна перадасць еўрапейскім краінам аналітычны дакумент Red Paper, у якім вызначаныя рызыкі, якія стварае рэжым Аляксандра Лукашэнкі для бяспекі Еўропы.
У дакуменце, падрыхтаваным яе камандай, адзначаецца, што будучыня еўрапейскай бяспекі «неад’емная ад будучыні Беларусі», якая знаходзіцца на ўсходнім флангу ЕЗ і «становіцца ўсё больш важным вузлом у геапалітычнай архітэктуры рэгіёну — як крыніца рызыкі, так і патэнцыйны якар стабільнасці».
Як паведаміла прэс-служба, раніцай 24 чэрвеня Святлана Ціханоўская сустрэлася ў Гаазе з кіраўніком ураду Нідэрландаў Дыкам Схофам і міністрам замежных спраў краіны Каспарам Вэлдкампам, па запрашэнні якога Святлана Ціханоўская ўдзельнічае у Адкрытым форуме NATO. Апрача таго, яна мела размовы з генеральным сакратаром NATO Маркам Рутэ і сенатарамі ЗША Крысам Кунсам і Джын Шахін.
