Дзяржава-«асвабадзіцель» тры ночы запар абараняла (чытай — тэрарызавала) амаль цалкам рускамоўную Адэсу. Адна з атак, паводле інфармацыі Сіл абароны Поўдня Украіны, каштавала больш за 109 мільёнаў даляраў. Сумарна трыццаць крылатых, балістычных, аэрабалістычных ракет розных тыпаў і трыста дронаў! І гэта толькі прыблізны кошт узбраенняў без уліку выдаткаў на поўную рэалізацыю атакі.
Замест альтэрнатыўных выдаткаў на развіццё грамадзянскай інфраструктуры ўласнай краіны РФ свядома абірае праводзіць маштабныя ракетна-дронавыя ўдары па ўкраінскіх гарадах. Прапагандысты зларадна завуць напады “ювелірнымі”, пры гэтым, нібы мантру, паўтараюць, што “Одесса – русский город”.
Тым часам адэсіты, якія ўжо некалькі сутак жывуць без электрычнасці, дзеляцца ў сетцы лайфхакамі: як сагрэцца з дапамогай цэглы; як прыгатаваць ежу на свечках; як ператварыць аўтамабіль у генератар. І ўсё гэта суправаджаецца каларытнымі, па-сапраўднаму адэскімі, каментарамі.
Людзі, для якіх гумар – філасофія жыцця, нават у такіх умовах пацвярджаюць свой унікальны культурны феномен, а смех выкарыстоўваюць як інструмент для пераадолення цяжкасцяў. І ненавідзяць “русский мир”, хоць той з усіх сіл і спрабуе перашкодзіць адэсітам рыхтавацца да навагодніх святаў. Не перашкодзіць. Такі да!
Ліза Ахроменка, Беларускае Радыё Рацыя
