Абраны прэзідэнт ЗША Дональд Трамп выступае супраць дазволу УСУ атакаваць тэрыторыю Расеі дальнабойнымі амерыканскімі ракетамі. Пра гэта ён заявіў у інтэрв’ю часопісу Time.
Пры гэтым Трамп прызнаў, што дамагчыся міру паміж Украінай і Расеяй можа быць больш складана, чым ён прагназаваў раней. Ён назваў сітуацыю вар’яцтвам і заявіў, што “развязаць праблему на Блізкім Усходзе прасцей, чым тое, што адбываецца паміж Расеяй і Украінай”.
Запуск амерыканскіх дальнабойных ракет па тэрыторыі Расеі, на яго думку, вядзе да абвастрэння канфлікту: “Навошта мы гэта робім? Мы проста абвастраем гэтую вайну і пагаршаем яе”. У Трампа спыталіся, ці адмовіцца ён ад падтрымкі Украіны. У адказ ён заявіў, што будзе выкарыстоўваць амерыканскую дапамогу Кіеву як рычаг ціску на Крэмль у перамовах аб спыненні агню.
